Neguko geldiunearen ostean, zapatuan ekingo diote berriz ere hileko
azken zapatuko feriari. 9:00etatik aurrera, Elgoibarko baserrietako
produktuak jarriko dituzte salgai kalebarren plazan, eta eguerditik
aurrera, ganadu erakusketa egingo dute Aita Agirre plazan. Horrez gain,
gatzatu tailerra antolatu dute Udalak eta Debemenek, Elgoibarko
Izarrararekin batera. (bideoa eta egitaraua dauzka)
Elgoibarko Udalak eta Debemenek baserriarekin eta landa eremuarekin zerikusia zuten ekimenak antolatzen hasi ziren iaz. Gatzatua egiten ikasteko tailerrarekin hasi zuten egitasmoa apirilean (ikus goiko bideoa). Eta, zapatu honetarako ere gatzatu tailerra antolatu dute, beste behin ere. Mintxeta baserriko ardi esnea erabiliko dute eta errezeta etxera eramateko aukera izango dute partaideek. Horrez gain, esnea nola eta zein sasoitan lortzen den azalduko zaie, eta ardiak nola jezten diren ikusi ahal izango dute.
•Txosna, Taupadak
Taupada antzerki taldeak hartuko du oraingoan feriako txosna, eta 11:00etatik aurrera haragi gisatu pintxoak eta salda banatuko dituzte. 12:00etan kale kantariak irtengo dira.