Neguko kiroletan nabarmendu dira, beste behin ere, gure ordezkariak

elgoibarren.net 2013ko mar. 12a, 16:03
Deskargatu Info Ahotsak :
es en fr

Joan zen asteburuan jokatu zuten Andres de Regil eski zeharkaldia Europako Mendietan, eta oraingoan Euskal Herrira etorri da garaipena. Bikoteka jokatzen da Regil zeharkaldia, eta Iñigo Lariz eta Mikel Navarro izan ziren onenak. Garaipen honekin, Euskal Herriko Kopa Txapelketa eskuratu dute taldeka. Neguko kirolak utzi gabe, Izaban jokatu zen Euskal Herriko neguko triatloi txapelketa, eta han ere puntan ibili ziren gure ordezkariak: Ibon Serranok hirugarren postua lortu zuen beteranoetan.


Lariz eta Navarro helmugara iristen. Arg. S. Yaniz.

Iñigo Larizek podiuma zeukan helburu Andres de Regil eski zeharkaldian, eta goreneko mailara igotzea lortu du Mikel Navarro urretxuarra sokalagun duela. Eski zeharkaldietan lasterketarik garrantzitsuenetakoa den proban 170 lagunek parte hartu zuten. Europako Mendietako Erdialdeko Mendigunean prestatutako ibilbidean ibili ziren guztiak, eta ibilbideko gora beherez gain, haize zakarra eta elurrari aurre egin behar izan zioten.
•Denboraldi emankorra
 Neguko denboraldia emankorra izaten ari da Iñigo Larizentzat. 2013ko Altitoy proban lehen bikote euskalduna izatea lortu zuen Mikel Navarro bikotekidearekin, otsailean Izaban jokatutako txapelketa bietan, -Euskal Herriko mendi eskiko igoeren banakako txapelketa eta erlojupekoa- txapeldun geratu zen. Eta, horiez gain, martxo hasieran Euskal Herriko Kilometro Bertikalen zirkuituko estreinako proba {Zuzenien} irabazi zuen Azpeitian. Eta sasoia borobiltzeko, Andres de Regil eski zeharkaldian gailendu da orain.
Larizekin batera, beste hainbat elgoibartarrek ere hartu zuten parte zeharkaldian: Arkaitz Irureta eta Javi Gonzalez bosgarren lekuan iritsi ziren eta Aitor Azkue eta Iker Leonardo hamaikagarren lekuan. Maite Maiora mendaroarrak Arkaitz Garairekin osatu zuen bikote mistoa eta hamahirugarren lekuan amaitu zuten proba. Josu Zabala eta Oihana Apellanizek ere hartu zuten parte. Haritz Arrieta eta Iñaki Laskurain, berriz, zapatuan jokatu zen proban aritu ziren.
•Bideoa: (Desnivel aldizkarikoek eginiko bideoa)

•Izabako triatloia

Ibon Serrano, Izabako neguko triatloian.

Erronkaribarreko neguko triatloiaren hirugarren ekinaldia jokatu zen Izaban, martxoaren 3an. Korrika (8 km), errepide-bizikleta (22 km) {Izabatik Belaguako iraupen eskiko pistetaraino} eta iraupen eskia (10 km) uztartu zituzten parte hartzaileek. Raul Roda ezkaroztarra eta Alba Xandri katalana izan ziren azkarrenak. Elgoibartik hiru lagunek: Ion Urbieta, Arkaitz Irureta eta Ibon Serranok hartu zuten parte proban. Erronkari bailarako triatloi zurian Euskadiko eta Nafarroako txapelak ere jokoan zeuden eta Ibon Serranok 3. postua lortu zuen beteranotan.
Kirola Elgoibar