Baserri-paisaien balioak agerian jartzeko ekintzak proposatzeko saioa

 

 

 Debemen, Debabarreneko Landa Garapen Elkartea, Gipuzkoa eta Bizkaiko beste zortzi Landa Garapen Elkarterekin batera landa-paisaia atlantikoen balioa agerian jartzeko ekimenean murgilduta dabil iaztik. Eskualdeka, baserri-paisaiek dituzten elementu bereizgarriak aztertzeko eta horien erronkak identifikatzeko parte-hartze saio irekiak burutu zituzten joan den urteko irailean.

Debemeneko arduradunen ustez, orain arte egitasmo honetan egindako lanak agerian utzi du baserri-paisaiak ez direla edonolako balioak dituzten paisaiak. “Oso nabarmena da baserri-paisaiek euskal kulturaren testuinguruan esanahi berezia dutela, bertako nortasuna, historia eta kulturaren oinarrizko elementu direlako, sinbolismoz beteak. XX. mendearen hasieratik nabaria da egun paisaian ikusgai diren hainbat elementu eta ezaugarri beste garai bateko baserriko kulturaren oinordeko direla, onerako eta txarrerako atzean utzitako garaien arrastoa, noizbait herri bezala izan ginen hori gogora ekartzea ahalbidetzen digun ebidentzia. Iragana guregana ekartzeko duten indar hori dela eta eutsi nahi die gizarteak neurri handi batean baserri-paisaiei”. Edonola ere, etorkizunera begiratzea ere ezinbestekoa dela-eta, hurrengo belaunaldiei utzi nahi diegun herentzia zein izango den guztion artean erabaki beharko genukeela uste dute, eta, era berean, egun lur horietan bizimodua irabazten dutenek bizi baldintza duinak izan ditzaten moduak bilatzea ere guztioi dagokigula uste dute. Bide horretan proposamenak egitea bilatuko du proiektu honen hurrengo faseak, eskualdeko baserri-paisaietarako ekintza zehatzak mahai gainean jarriz.

•Baserri-paisaien balioa agerian
 Hortaz, elementu bereizgarriak kontserbatu zein baserri-paisaien balioa agerian jartzeko ekintza aproposenak identifikatzeko saioa burutuko da. Saio horren helburuak aurreko saioetatik ateratako ondorio nagusienak gogoratzea, ekintzen finantziazio modu berriak aztertzea, eta landa-paisaien balioa agerian jartzeko ekintzak lantzea dira.
 Saioaren ondoren, proposatzen diren ekintzen zehaztapenean sakonduko da eta horiek eskualdeko administrazioei eta eragile sozial eta ekonomikoei aurkeztuko zaizkie, hurrengo urteetan ekimenak gauzatzeko asmoz. Proiektuaren helburu dira ere lehen sektoreak guztion ongizateari egiten dizkion ekarpenen artean baserri-paisaien balioak mantentzeari dagozkionak azpimarratzea, eta horien inguruan gizartea sentiberatzea, baita eskualdeko baserritarrei haien produktuei beste balio erantsi bat gehitzeko aukera aurkeztea, proiektuaren emaitzak komunikatuz.

•  Horrenbestez, Debemenek Debabarreneko biztanleei dei egiten die apirilaren 24an (19:00-21:00) Elgoibarreko Kultur Etxeko sotoan ospatuko den saio irekian parte hartzera. Aldez aurretik izena ematea beharrezkoa da: paisaia.atl@paisaia.com edo 686 738 152 / 943 335048.