Gazteentzako gune berriak sortzeko asmoz, gazteen aisialdi ohiturak
ikertzeko Gaztemapping izeneko egitasmoa sortu du Udaleko Gazteria
Sailak, Manahmana enpresarekin elkarlanean. Ikerketa hau ondo irtengo
bada, gazteen parte-hartzea ezinbestekoa dela jakinarazi dute
sustatzaileek, bai ikertzeko eta baita ikertuak izateko ere.
Horretarako, bi tailer prestatu dituzte uztailerako. Eguenean (uztailak 11)
egingo dute lehenengoa, 10:00etan, Kultur Etxean, eta datorren eguenean
egingo dute bigarrena.
Tailerretan Udaleko pertsonen batzordearekin eta gazteekin proiektua diseinatu eta lan sistema zehaztuko dute. Irailean bi formazio saio egingo dituzte gazteak ikerketarako prestatzeko, eta ikerketa bera, urrian hasiko dute. 13 eta 30 urte arteko edonork har dezake parte, eta Manahmana enpresatik elgoibartar guztiak gonbidatu nahi dituzte. Tailerrak, esan bezala, uztailaren 11n eta 18an izango dira, 10:00etatik aurrera, Elgoibarko Kultur Etxean.
•Gazteek gazteentzako egindako proiektua
Ikerketa-ekintza proposamen honetan hamabost gazte ikertzailek beraien inguruko beste hogei gazteren ohiturak ikertuko dituzte. Elgoibarko baliabideen erabilera, gazteen partaidetza, beharrak eta interesak aztertuko dituzte, besteak beste. "Ezjakintasun handia dago gazteen aisialdiaren inguruan", esan du Aitor Guisasola Manahmanako kideak. Ikerketa honi esker, gazteen ohiturak ezagutuko dituzte. Ikerketa kualitatiboa egingo dute, eta, diagnosia amaitu ostean ateratako ondorioek gazteria politika berriak diseinatzeko edo gazteentzako ekintza egokiak antolatzeko balioko dute. Azken batean, Gaztemapping egitasmoaren bidez gazteak motibatu eta aktibatu nahi dituzte.
