Denboraldiko jokalari onena akeratu dute Buitre, Conceptoko jokalari ohia

elgoibarren.net 2013ko uzt. 15a, 16:27
Deskargatu Info Ahotsak :

 
Alvaro Barrera "Buitre" Concepto Egile areto futbol taldeko jokalaria aukeratu dute denboraldiko jokalari onena. Hegaleko pibot postuan jokatzen duen hogei urteko jokalari madrildarrak 25 gol sartu ditu joan den denboraldian, eta taldeak izan duen arrakastaren giltzetako bat izan da. Egin duen denboraldiak oihartzun handia izan du eta saritzat Lehen Mailako talde batek fitxatu du, Castellòko Peñiscolak, hain zuzen ere.



Alvaro Barrera

Denboraldi aparta egin du Debabarrena Concepto Egile areto futbol taldeak, nahiz eta Bigarren Mailara igotzeari uko egin behar izan zion, klubak ezin ziolako ekonomikoki erronka horri aurre egin. Gutxienez, taldearen historiarako gordeta geratuko dira lorpen ugari, tartean Liga txapelketa edo igoera kanporaketak gainditu izana. Talde modura lortutako lorpenei, banakako errekonozimenduak ere gehitu behar zaizkie. Izan ere, MVP saria eman diote entrenatzaileek Buitreri. Eta, jokalari onenen zerrendan laugarren postuan ageri da Debabarrenako klubeko beste jokalari bat, Raul Nieto. Laugarren postuan, hain justu ere.

•Denboraldi berrirako lanean
 Bigarren B mailan jokatuko du taldeak berriz ere hurrengo denboraldian, eta dagoeneko hasi dira denboraldia prestatzen. Zuzendaritzak lan handia egin beharko du, izan ere, jokalari garrantzitsuen baja izan du Concepto Egilek. David Garrido eta Xabi Perezek areto futbola uzteko unea iritsi zaiela jakinarazi dute, eta Joseba Balerdi eta Unai labakak taldea utzi behar izan dute, ikasketa eta lan kontuegatik. Arazo ekonomikoak medio, bestalde, Fher eta Koldo jokalariak ezin izan dituzte taldean mantendu, eta Buitrek lehenengo mailako talde batean {Peñiscola F.S.} jokatuko du datorren denboraldian. Hala ere, jokalari batzuk datorren urtean jarraituko dutela jakinarazi dute: Ekaitz Insausti eta Iker Oñederra atezainak, Alex Alonso, Ivan Quintin, Michael Vidal eta Raul Nieto. Horiekin, baina, ez da nahikoa eta fitxaketa berriak egiten hasi da zuzendaritza. BARRENek aurreratu zuen moduan, Jota Arregi izango da taldeko entrenatzailea datorren denboraldian, eta jokalari berriak ere izango dira. Horietako bat, Mikel Treviño arabarra izango da. 3. Mailako Aurrera taldean egin ditu azken bi denboraldiak, eta aurten bigarren egin dute ligan. Aurrez, Nazional A mailako legutio eta Aretxabaleta taldeetan ibilitakoa da. Jose Ramon Iriarte taldeko presidenteak jakinarazi du hau izan dela lehenengo fitxaketa, baina gehiago egingo dituztela.

 Era berean, hurrengo denboraldiko partiden egiutegia argitaratu ez bada ere, dagoeneko badakite  Bigarren B mailako bigarren multzoan aurkari izango dituzten taldeak zein diren. Horien artean, bost euskal talde daude aurten.
 
∞Lotura duten albisteak:
 
 
 
 
 
 
 
 
 
 
Kirola Elgoibar