Ipar Amerikatik, Kanadatik hain justu, Ensemble Folklorique Mackinaw taldea etorriko da; eta hegoaldetik, berriz, Peruko Jallmay. Esan bezala, Txankakua merkataritza elkarteko dendetan salgai daude jaialdirako sarrerak. Dena den, kiroldegiko leihatilan ere egongo dira salgai sarrerak. 22:30ean hasiko da dantzaldia.
•Mackinaw - Kanada
Konpainia hau 1974an sortu zuten, Actoneko Tovarich eta Drummondvilleko Alunelul folklore-taldeen elkartzetik. Azken herri horretan du egoitza, Quebec erdialdean, eta folklore tradizionalaren berreskuratze eta mantentze lanetan dihardu, esperientzia handiko giza-talde baten zuzendaritzapean. Taldearen izena, Mackinaw, antzina basoan lanerako erabili ohi zen jaka gorri eta beltzetik dator. Quebectar dantzen bilduma zabala aurkezten du, eta dantza eta antzerki-izaera uztartuz.
•Jallmay - Peru
Jallmay hitzak “lurra astintzea” esan nahi du kitxueraz. 1996an sortu zuten kultur-elkartea, Peruko kultur aniztasuna sustatu eta hango ondarea babesteko asmoarekin. Izan ere, Peruko topografiaren ezaugarriek eskualde bakoitzean eta, zenbait kasutan, herri bakoitzean bertako dantzak garatzea ekarri zuten. Jallmay elkartearen ikuskizunek, beraz, Peruko aniztasuan horren irudia eskaintzen dute, eta horixe da beraien originaltasuna.
•Haritz EDT - Euskal Herria
Haritzek 40 urte betetzen ditu aurten, eta 27. Folklore jaialdia antolatu dute eguaztenerako. Oraingoan, Nafarroako dantzak taularatuko dituzte. Lehen zatian, Erronkariko Ttun-ttuna, Baztango zortzikoa, eta Iturengo soka-dantza izango ditugu ikusgai. Bigarren zatian berriz, Behe Nafarroara jauzi egingo dute, Luzaideko dantza koloretsu eta alaiak eskainiz. Artero pazko-igandez antzezten den inauteria aurkeztuko dute, besteak beste, kontradantzak, jauzia, sorginak eta euskaldunak, kadrillea eta dantza luzea eskainiz.