San Bartolome jaietako “harmonia, tolerantzia eta alaitasuna” nabarmendu ditu Elgoibarko Udalak

elgoibarren.net 2013ko ira. 6a, 15:22

San Bartolome jaien balorazioaren berri eman dute udal arduradunek, gaur eguerdian. Joan diren jaietan izan dugun “harmonia, tolerantzia eta alaitasuna” nabarmendu ditu Amaia Txurruka kultura zinegotziak, Elgoibarko Udalaren izenean. Era berean, Javier Oñederra udaltzainburuak “intzidentziarik eza” azpimarratu du eta lasaitzat jo ditu 2013ko festak. Delituzko esku-hartzeak gutxitu egin direla ohartarazi du. Era berean, lapurreta eta ondasun-kalteei buruzko salaketak gutxitu dira. Goiko bideoan, 2013ko San Bartolome jaien laburpena ikus dezakezue. (argazkiak eta bideoak dauzka)

Egunez eguneko balorazioa egin du Elgoibarko Udalak, eta egitarauko ekintzarik nabarmenenenak azpimarratu dituzte.

Irakurri osorik UDALAREN BALORAZIOA, PDFan

•Jai "lasaiak", Udaltzaingoaren ikuspuntutik
Elgoibarko Udaltzaingoak ere egin du jaien inguruko balorazioa. Javier Oñederra udaltzainburuaren esanetan, lasaiak izan dira jaiak, eta intzidentzia handirik gabe igaro dira. “Delituzko esku-hartzeak gutxitu egin dira, baita lapurretei eta ondasun-kalteei buruzko salaketak ere”, azaldu du Oñederrak. Jaiak bi asteburutan banatuta egon arren, lasai joan direla dio eta aurreko urteetan baino esku-hartze gutxiago egin behar izan dituztela gaineratu du {ikus beherago dagoen txostenean 2010etik 2013ra arteko datuen konparaketa}. Aipatzekoen artean, 16 urtetik beherakoei egindako hiru esku-hartze aipatu ditu, alkoholaren eraginpean zeudela-eta hirurek osasun asistentzia behar izan zuten-eta.
Domekan egiten diren sokamuturrei beldurra dietela onartu du udaltzainburuak. Ohikoa duten legez, udaltzainek kontrol zorrotza egin zuten sokamuturran ibiltzeko baldintzak bete ez arren ibilbidean sartu nahi zutenekin, eta, aurreko urteetan baino arazo gutxiago izan zituztela horiekin adierazi du.