Aranzadi Zientzia Elkarteko herpetologia saila burutzen ari den "We are snake-friendly" egitasmoaren barruan eskainiko du hitzaldia Izagirrek, eta suge eta sugegorrien inguruko hainbat uste okerri buruzko azalpenak emango ditu, "gure artean hain ezezagunak diren animalia hauek ezagutzera emateko eta gizarteak horien inguruan duen ikuspuntu okerra aldatzeko" helburuarekin.
Hitzaldiaren amaieran, gainera, gure inguruetan bizi diren sugeak bertatik bertara ikusi eta ezagutzeko aukera izango dute auditorioan batzen diren lagunek. (www.aranzadi-zientziak.org)
Hurrengo astean, azaroaren 13an, Arkaitz Astiazaran itziartarrak udaberrian Euskal Herrian barrena egindako bizikleta ibilaldiaren inguruan jardungo du, zikloko bigarren emanaldian. 4.400 kilometro egin zituen, 37 etapatan. Andoni Ormazabalen txanda izango da gero. Hilaren 20an, Lehoinabarraren aztarna, Himalayan galdu zuen anaia Xabi Ormazabalen inguruko ikusentzunezkoa eskainiko du Andonik. Bukatzeko, azaroaren 28an, mendiaren alde ez teknikoaz mintzatuko da David Vilegas mendizalea.
- Informazio osoagoa: morkaiko.net