Maite Maiora seigarren postuan dago munduko mendi lasterkari onenen sailkapenean

 Orain dela hiru aste ultra-trail korrikalari onenen zerrenda kaleratu zuen Nazioarteko Mendi Lasterketen Federazioak (ISF International Skyrunning Federation); orain, berriz, maratoiak eta maratoi erdiak kontuan hartuta osatutako sailkapena kaleratu berri du.

 2013an bost kontinenteetan jokatu diren 21 lasterketetako emaitzak hartu dituzte kontutan {Zegama-Aizkorri, Elbrus Skymarathon, Mont-Blanc Marathon, Dolomites Skyrace, Pikes Pike Marathon, e.a.}, eta 29 herrialdetako 216 antxitxikariren emaitzak neurtu dituzte. Guztira 100 gizonezko eta 50 emakumezko jasotzen ditu zerrendak. Guztien buru Kilian Jornet katalana eta Emelie Forsberg suediarra ageri dira, beste behin ere.

Euskaldun askoren izenak ere ageri dira zerrendan: gizonezkoetan Ionut Zinca Gasteizen errotutako errumaniarra bigarren postuan dago eta emakumezkoetan, berriz, Maite Maiora mendaroarra da zerrendako lehen euskalduna, seigarren postuan, Emanuela Brizio korrikalari italiar beteranoa baino postu bat atzerago, hain justu ere.  

 Aipaturiko Emilie Forsberg suediarra, Stevie Kremer estatubatuarra eta Nuria Picas katalana daude, hurrenez hurren, emakumeen lehen hiru postuetan.

• Munduko 50 emakume onenen zerrenda, ISFren arabera (PDF)

*Iturria: Ibilkari, Berriaren mendiaren inguruko kanala.

  *Argazkiak: Carlos Diaz Recio eta Jordi Saragossa.