Bi elgoibartar eta mendaroar bat saritu dituzte Kutxaren ikasketa amaierako sarietan

 Kutxaren Gizarte Ekintzak, goi-mailako ikasketak egiten ari diren gipuzkoar gazteak "akuilatu" nahirik, Ikasketa Amaierako XXXVII. Sariak antolatu ditu. Sari horietan, 2012-2013 ikasturtean unibertsitate-ikasketak bukatzean, karrerako espediente akademikorik onenak lortu dituzten ikasleak saritzen dituzte, 59 ikasle aurten. Joan den azaroaren 18an egin zuten aurtengo sari banaketa ekitaldia Donostiako Kutxa Andia Aretoan. Han izan ziren, sarituen artean, Garazi Konde eta Eneko Etxaniz elgoibartarrak eta Mirari Egaña mendaroarra.

•Eneko Etxaniz

Ingeniaritza Zibileko Gradua ikasi du Eneko Etxanizek Unibertsitate Eskola Politeknikoan (EHU). Bere esanetan, saririk handiena lau urteko karrera gainditzea izan da. Ikasketa amaierako espediente onenaren saria, berriz, sari nagusi horri ginda jarri dion sari bat gehiago izan da. Ez du, baina, saria gutxietsi nahi eta curriculumean jartzeko "oso erabilgarria" izan dakiokeela uste du. Ikasketak gustura egin dituela aitortu du, horren gogokoak ez zituen irakasgaiak gainditu behar izan baditu ere. "Ikasketa guztietan gertatzen den moduan", zehaztu du.

 "Oro har, gustatu zaizkit ikasketak, eta hori ezinbestekoa da nota onak ateratzeko". Lan munduaz galdetuta, "nahiko beltz" ikusten du egoera, bai orokorrean eta bai bere kasu partikularrean. "Izan ere, eraikuntza publikoan dago ingeniari zibilon lan merkatu nagusia, eta, gauzak dauden moduan egonda, lan gutxi dago une honetan", azaldu du. Ondorioz, ikasten jarraitzea erabaki du eta Errepideen, Portuen eta Kanalen ingeniaritzan Master bat ikastera joana da Santanderrera.

•Mirari Egaña

Mirari Egaña mendaroarrak Mondragon Unibertsitateko Arrasate Goi Eskola Politeknikoan burutu ditu ikasketak, Industria Diseinuko eta Produktu Garapenako Ingeniaritzan Gradua, hain zuzen ere. Espediente onenaren sariak ezustean harrapatu duela dio. “Ez nuen sari honen berririk, eta ez nuen uste nota altuena neukanik ere. Banekien Erasmus programan izena ematerakoan goi aldean jarri nindutela zerrendetan -eta nota akademikoa kontuan hartzen dutela-, baina, hala ere, Arrasateko Unibertsitatik deitu zidatenean sinistu ezinda geratu nintzen”, azaldu du.

 Sariaren berri izan zuenean lau urtean eginiko ahaleginek “merezi izan dutela” sentitu zuen. Une onak eta txarrak tartekatu dituen arren, gustura aritu da ikasten, bai Arrasaten eta baita atzerrian egon zenean ere. Industria Diseinuko Ingeniaritza ikasketak amaitu ostean, lana topatzeko dauden zailtasunak ikusita, ikasten jarraitzea erabaki zuen, “dena beharko delako gaur egun gustuko zerbaiten lana aurkitzeko”. Aurrez eginiko ikasketak osatzeko antolakuntzarekin zerikusia duten ikasketak aukeratu zituen. Une honetan master bat ikasten ari da, Unibertsitate Masterra Enpresa Berrikuntza eta Proiektu Zuzendaritzan, Arrasaten bertan.

•Garazi Konde

Lidergo Ekintzailea eta Berrikuntza Gradua ikasi du Garazi Kondek Oñati Enpresagintza Fakultatean. Ikasketak amaitu dituzten estreinako promozioko kidea izateaz gainera, horien artean espediente onena atera du ikasle elgoibartarrak. Kutxak antolatutako sariek ekintzailetasunari merezi duen "garrantzia eta izena" ematen diotela uste du. Izan ere, unibertsitateko ikasketak hasi eta bat enpresa bat sortu zuen ikaskide batzuekin batera. “Lau urtean gogor egin dugu lan, atzerrian ere moldatu gara eta zenbait egitasmo garatu ditugu han eta hemen, eta sari hori pertsona bakarrak jaso badu ere, etxekoei eta taldeari esker izan da”, azaldu du Garazi Kondek Finlandiatik, Europa iparraldeko herrialde horretan baitago eskuartean dituzten proiektu horietako batean lanean.
 Gaur egun, amaitu berri duen Mondragon Unibertsitateko LEINN graduan "team-coach" edo "talde entrenatzaile" lanetan dihardu. Horrez gain, “eskola libre eta alternatibo bat” sortzeko proiektuan buru belarri sartuta dabil, “Mara-Mara Familia Eskola” izeneko egitasmoaren barruan, hain justu ere. Uribe-Kostako zenbait familiarekin elkarlanean dihardute. Izan ere, hezkuntza alternatiboan ikusten du bere burua Kondek momentuz, eta etorkizunean "batek daki”.