'Gabrielen Lekua' ikuskizunean parte hartzen ari dira Iban Urizar eta Naia Membrillera

elgoibarren.net 2013ko aza. 29a, 09:37
Deskargatu Info Ahotsak :
es en fr

 
Gabriel Aresti poeta bilbotarraren bizitza eta izena hedatzeko, diziplina anitzeko kultur ikuskizuna ekoitzi du Gabriel Aresti Kultur Elkarteak. Hainbat artista batu dira 'Gabrielen Lekua' izeneko ikuskizun honetan: Andoni Egaña, Ainhoa Alberdi, Alain Urrutia, Iraia Elias, Oier Guillan, Rafa Rueda, eta baita Naia Membrillera eta Iban Urizar musikari elgoibartarrak ere.

 


 Iban Urizarrek beste hainbat musikarirekin ere kolaboratu izan du aurrez, baina Membrillerarentzat lehenengo esperientzia da honakoa. Gabrielen Lekua sentikarian Arestiren poemei musika jartzen diote batak zein besteak. Musikenen Goi Mailako Musika ikasketak egiten dihardu Membrillerak. BARREN aldizkariari eskaini dion elkarrizketan adierazi duenez, "sekulako" aukera izaten ari da hau. "Kulturgintzako jende ezagun asko ari da parte hartzen ikuskizunean, eta bakoitza bere alorrean oso jakituna da. Horiek esaten duten guztia atentzio handiz entzuten dut, eta entzutearekin bakarrik, pila bat ikasten dut", dio. (elkarrizketa osoa BARREN 888. zenbakia - PDF)

Naia Membrillera eta Iban Urizar (esk.), entseguetako batean.

Naia Membrillerak perkusioa jotzen du ikuskizunean. Arg: Alain Urrutia.

•Arestiren figuraren aldarrikapena

1706637155253 'Gabrielen Lekua' ikuskizunean parte hartzen ari dira Iban Urizar eta Naia Membrillera

Gabriel Aresti kultur elkarteak ekoitzitako lehen ikuskizuna da Gabrielen Lekua sentikaria. Ekainean aurkeztu zuten elkartea, eta Zenbat Gara elkarteak eta euskal idazlearen familiak osatu dute. Gabriel Arestiren lana eta figura aldarrikatu eta ezagutzera emateko sorturiko ikuskizuna da. Horren bidez, belaunaldi batzuek hura gogoratzeko aukera izango dute, eta beste batzuek, hura deskubritzeko aukera. Arestiren bizitza markatu zuten toki eta gai batzuek protagonismoa dute lan honetan: Bilbo, Baiona, Arantzazu, atzerria eta euskal kultura eta literatura. Aresti poliedrikoa ageri da bertan, haurtzarotik euskara ikastea erabaki zuenera arte. Justizia soziala aldarrikatu zuen, hainbat lagunekin lan egin zuen eta euskara batuaren sorreraz kezkatu zen, eta horren ideologia ere agerian utzi dute lan honetan. (iturria: eitb.com)

•Estreinaldia Arriagan
 Hilabeteak lanean eman ostean, joan den urriaren 29an estreinatu zuten Gabrielen Lekua ikuskizuna Bilboko Arriaga Antzokian. Etenaldi txiki baten ostean, aste honetan bertan hasiko dira berriz emanaldiekin eta uztailera arte jarraitzeko asmoa daukate.

•Disko-liburua
 Ikuskizunaren izen bereko disko-liburua ere sortu dute. Puntu beretik abiatzen da, baina eduki eta ikuskizunaren trataera berezia du, Paddy Rekalde, Luigi Anselmi, Hedoi Etxart, Amaia Lasa, Oier Guillan eta Andoni Egaña kolaboratzaileen testuen bidez. Diskoari dagokionez, Rafa Ruedak musikatu ditu Arestiren testuak eta Iban Urizar eta Naia Membrillerak musikatu dituzte. Dagoeneko eskuragarri dago disko-liburua.
Kultura Elgoibar