Euskarazko ikuskizunak eta kultur jarduerak nagusi abenduan

elgoibarren.net 2013ko abe. 4a, 14:15

Urtea amaitu artean hainbat kultur jarduera eta ikuskizun antolatu ditu Elgoibarko Udalak. Horietako gehienak edo ia denak euskaraz gozatzeko aukera izango da. Hasteko, Mikel Markezek eta Eñaut Elorrietak Baga, Biga, Higa Euskal Musikaren Transmisioa izeneko hitzaldi musikatua eskaini dute, gaur eguerdian, herriko ikasleen aurrean. Egunenean eta barixakuan, berriz, Amaren eskuak filma ikusteko aukera izango da Herriko Antzokian. Zaira Zanguitu elgoibartarrak filmazioetan parte hartu zuen filma, hain justu ere.

Euskararen Eguneko kanpainarekin -Euskarak 365 Egun- bat eginez, Elgoibarko Udalak abendurako prestatu duen kultur eskaintzan euskara izango da antolatu dituzten ekitaldi guztien arteko lotunea, eta gai nagusia ere bai horietako batean.

Zaira Zanguitu elgoibartarrak parte hartu du 'Amaren eskuak' filmaren ekoizpenean

•Amaren eskuak filma, eguenean eta barixakuan
Mireia Gabilondok zuzendu duen Amaren Eskuak filma jatorrizko bertsioan, euskaraz, ikusteko aukera izango da, gaztelerazko azpitituluekin. 2012ko udan filmatu zuten Karmele Jaioren eleberrian oinarrituta dagoen Amaren Eskuak filma. Filmazioetan, gainera, zuzendaritza taldeko kidea izan zen Zaira Zanguitu elgoibartarra. BARREN aldizkariari eskaini zion elkarrizketan eman zigun bere lanaren berri Zanguituk (BARREN 880. zenbakia PDF). Abenduaren 5ean, 21:30ean eskainiko dute filma eta abenduaren 6an 22:15ean.

Sinopsia: "Nereak, 38 urte ditu, bere bizitza familiarra eta profesionala uztartu nahi duen ama bat da. Egunkari bateko erredakzioan egiten du lan. Egun batetik bestera ordea, bizitza aldatuko zaio bere ama Luisa ospitalera eramango duten egunean memoria galera bat dela eta. Nerea errudun sentitzen da gaixotasunaren lehen arrastoak hasi zirenean erreakzionatu ez zuelako, eta orain, Luisaren erlojuak atzera salto nola egiten duen ikusiko du. Bere amaren bizimoduaren alderdi berri bat ezagutuko du, eta bien iraganeko bizipenen parekotasunaz eta euren memorian dauden mamuez ohartuko da."

•Euskararen espektakulue, Oihan Vegarekin

1706637149213 Euskarazko ikuskizunak eta kultur jarduerak nagusi abenduan

Nork daki euskaraz iraintzen? Eguneroko bizitzan zergatik jotzen dugu horrenbeste erdarara? Umorea eta sarkasmoa erabiliz, euskararen inguruan aritzera gonbidatzen gaitu Oihan Vegak bakarrizketa komiko dibertigarri eta ironiko honekin, musikaz, kantuez eta zineaz lagunduta. Telebistako filmak berreskuratuko ditu Oihan Vegak, euskal zinearen azterketa ironikoa egiteko, izan ere, nork ikusten du zinea euskaraz? Zein garrantzia ematen zaio euskarari telebistan eta komunikabideetan oro har?. Abenduaren 13an ekarriko du Vegak bere espektakulue Elgoibarrera. Herriko Antzokian izango da, 20:30ean. Sarrerak www.kutxa.net eta leihatilaren bitartez salduko dituzte. Bost euroan eskuratu daitezke.
Bakarrizketaren aurrerapen bideoa:

•Taupadaren "Erotik" antzezlana, abenduaren 20an
Aurrekoez gainera, Taupada Antzerki Taldeak Erotik antzezlana eskainiko du abenduaren 20an Herriko Antzokian. Olentzeroren Ametsak ikuskizuna ere Herriko Antzokian emango dute, abenduaren 22an. Horien berri emango dizuegu aurrerago.

Kultura Elgoibar