Eskubaloia: Euskadiko emakumezkoen selekzioak Txileko selekzioaren aurka jokatuko du Elgoibarren

Jon Redondo, Eusko Jaurlaritzako Kirol Zuzendariak, Jose Manuel Ruiz, Euskadiko Eskubaloi Federazioko presidenteak, Euskadiko hautatzaile Imanol Alvarezek, Txileko selekzioko hautatzaile Iñaki Añizek eta Elgoibarko alkate Alfredo Etxeberriak aurkeztu dute gaur eguerdian bi selekzioek Elgoibarren jokatuko duten lagunarteko partida. Irudi bitxia laga dute, emakumezkoen bi selekzioek jokatu beharreko partida iragartzeko osatu duten mahaian ez baita emakumezkorik izan.

•Harmailetan giro ona espero du Euskadiko hautatzaileak
 Euskadiko hautatzaileak, Bera Bera taldeko entrenatzailea ere baden Imanol Alvarezek, partida jokatzeko deitu dituen jokalarien zerrenda eman du ezagutzera prentsaurreko agerraldian. Hautatu dituen hamabost jokalarien artean ez dago elgoibartarrik. Txileren aurka jokatzea "plazer bat" izango dela adierazi du Alvarezek, besteak beste, "aspaldiko lagun bat" delako Txileko hautatzailea, Iñaki Añiz iruindarra, hain zuzen ere. Osatu zezakeen selekziorik onena bildu duela adierazi du Euskadiko hautatzaileak. Elgoibarko zaleentzat ere izan ditu hitzak. "Elgoibarko herria eta zaleak ezagututa ziur giro ona sortuko dutela partida egunean eta seguru nago, baita ere, harmailak beteko dituztela, eskubaloi partidetan ohi duten moduan".

•Irabaztera dator Txileko selekzioa
 Txileko hautatzaileak partida on bat ikusteko aukera izango dutela zaleek aurreratu du eta bere taldearen mailaren berri eman du. "Erdi edo behe mailako taldea da gurea Hego Ameriketako eskubaloian. Une honetan Serbian jokatzen diharduten munduko eskubaloi txapelketan parte hartzen ari diren Brasil edo Argentina moduko talde indartsuen mailatik hurruin gaude oraindik", aitortu du. Hala ere, Elgoibarrera irabaztera etorriko direla adierazi du. "Partida zaila izango da guretzat, Europako txapelketan aritutako jokalariak izango ditugulako aurrez aurre, baina irabaztera gatoz".

•Ohitura berreskuratu

Hainbat denboralditan Sanloko gizonezkoen talde nagusiko entrenatzailea izana den Jose Manuel Ruiz da gaur egun Euskadiko Eskubaloi Federazioko presidentea. Euskadiko selekzioek eguberrietan jokatzen zituzten lagunarteko partidak berreskuratzeko lan egingo dutela aditzera eman du. Elgoibarren berreskuratuko dute ohitura hori. Partida honek ikusmina sortu duela gaineratu du eta Oñatitik, Errenteriatik eta Bizkaitik autobusak antolatu dituztela partida ikustera etortzeko.

• SARRERAK: Partida ikusteko sarrerak bost euroan salduko dituzte (2 euroan gazteentzako sarrerak).
• ORDUTEGIA eta ENTRENAMENDUA: Partida 17:00etan hasiko da, abenduaren 14an. Partidaren bezperan, abenduaren 13an, Olaizaga kiroldegian egingo du entrenamendua Euskadiko selekzioak, 19:45etik 21:45era.

•Euskadiko selekzioa osatuko duten jokalariak:

• Esther Arrojeria
• Alba Menendez
• Nagore Arizaga
• Maxalen Ziarsolo
• Silvia Ederra
• Ainhoa Hernandez
• Tania Yanez
• Janire Etxabe
• Nahia Galarza
• Leire Garcia
• Nerea Elizegi
• Jessica Nogales
• Maialen Mujica
• Naryth de la Cruz
• Andrea Egozkue