Bertsolari Txapelketa Nagusiarekin bat egiten duen urteetan erakarmen handiagoa izaten du Elgoibarko Izarrak Eguberrietan antolatzen duen bertso saioak, eta aurten ere halaxe izan da. Salgai jarri zituzten lehenengo egunean agortu ziren sarrera guztiak, atzo, eta saioa San Bartolome parrokiara eramatea erabaki dute.
•16:00etan abiatuko da sarreren salmenta
Gaur arratsaldean, 16:00etatik aurrera, hasiko dira berriz sarrerak saltzen. Oraindik ez dakite zenbat sarrera jarriko dituzten salgai, baina ez dute sarrerarik gordeko. Beraz, sarrera gabe geratu nahi ez duenak azkar ibili beharko du. Sarrerak Elgoibarko Izarrak Ubitarten daukan lokalean salduko dituzte, ohi duten moduan.
Pertsona bakoitzak gehienez ere hamar sarrera erosi ahal izango ditu.
Abenduaren 27an, barixakuan, izango da saioa 22:00etan, San Bartolome parrokian, eta Maialen Lujanbio, Igor Elortza, Onintza Enbeita, Andoni Egaña eta Amets Arzallus ariko dira bertsotan. Hortaz, azken hiru Bertsolari Txapelketa Nagusietako irabazleek bat egingo dute parrokian egokituko duten oholtza gainean: Andoni Egañak, Maialen Lujanbiok eta joan den domekan txapela jantzi zuen Amets Arzallusek.
Joan den urtean moduan,
aurten ere Uxue Alberdik egingo ditu gai-jartzaile lanak.