Alcer Gipuzkoako presidentea da Koro Aldaz, eta duela hogei urte transplantatu zioten giltzurruna, alabaz erditu eta gutxira, sei urtez dialisia egiten ibili ostean. Ez zituen urte errazak bizi izan, baina gaur, emaile anonimo hark emandako giltzurrunari esker, bizimodu "normala" egiten du, eta zorionekoa da. "Asko zaintzen naiz, organua eman zidan hari ere zor diodalako, baina gainerakoan oso ondo nago". Ordutik gaur arte, gauzak asko aldatu dira, eta nabarmen gutxitu da transplantatzeko zain daudenek zain egon beharreko denbora ere.
•Bizi asko salbatzeko aukera
Pasa zuten euren kalbarioa, denbora guzti horretan dena ez delako zoriona, baina gaur bizitako guztiaren alde onari erreparatzen diote. Esker oneko hitzak baino ez dituzte bizia eman zietenentzako, alboan egokitu zitzaien mediku eta erizain taldeentzako, urtean zehar euren elkartea diruz laguntzen dutenentzako, eta baita, jakina, gaur organoak edota ehunak ematea erabakitzen dutenentzat. Organu emaile bakar batek bizi asko salba ditzakeela ohartarazi dute.
•EiTB maratoia egun osoan
Mende hasieran, 2.000. urtean, hasi zen EiTB elkartasun maratoiak antolatzen. Aurtengo maratoia Organo eta Ehunen Transplanteen gaineko ikerketara zuzenduta dago, eta 'Oparitu Bizia' da aukeratu duten leloa. Diru ekarpenak egiteko hiru era daude: 902 542 525 telefono zenbakian, Kutxabanken zabalik dagoen kontu korrontean (2095 0611 00 9109513824) eta Internet bidez.
Bitxikeria bat ere badu aurtengo elkartasun maratoiak, Iker Karrera kirolari amezketarrak egingo duen erronka solidarioa, hain zuzen ere. EiTBk Bilbon duen egoitzatik Pagasarri mendira ahal bezainbeste alditan igotzen saiatuko da, 12 orduz, transplanteen aldeko kanpainari bultzada emateko asmoz. Dagoeneko ekin dio bere erronkari.