Morkaiko mendi taldeak prest du urteko ekintzen egutegia

elgoibarren.net 2014ko urt. 22a, 16:43

2014rako prestatu dituzten ekintzen eta irteeren egutegia jakitera eman du Morkaiko Mendizale Elkarteak. Era guztietako ekintzak prestatu dituztela nabarmendu dute, “txiki eta nagusientzat, oinezko eta mendiko bizikleta zaleentzat, mendi eski eta elur zaleentzat…”. Hasteko, ume eta nagusientzako irteera antolatu dute Xoxotera domekarako (urtarrilak 26). Eta, otsailaren 8an, berriz, Sargoateko iturria berreskuratzeko beste saio bat egingo dute (egutegia dauka)

Urte berriarekin batera, 2014ko ekintzen egutegia aurkeztu du Morkaiko mendi taldeak. Gustu guztietarako ekintzak eta irteerak antolatzen saiatu direla esan dute. Gainera, Morkaikoren ateak guztientzat zabalik daudela gogora ekarri dute, alegia, edozein proposamen entzuteko eta antolatzeko prest daudela. Aurtengorako prestatu dituzten irteeren artean, Pirinioetara mendi eskia egitera antolatu dituzten hiru irteerak {martxoan eta apirilean}, eta, Oionetik (Araba) Bermeora (Bizkaia) egingo duten lau egunetako BTT irteera nabarmendu daitezke.

Ikusi hemen 2014ko ekintza guztien Morkaikoren egutegia.

•Sargoateko iturria berreskuratzeko saioa

1706637038056 Morkaiko mendi taldeak prest du urteko ekintzen egutegia

Morkaikok interes berezia duten mendi inguruak auzolanean berreskuratzeko proiektua jarri zuen martxan iaz. Lehenengo lana Sargoateko iturri ingurua berritzea izan zen, joan den urrian. Mendi taldearen lanerako deiak erantzun zabala izan zuen eta 30 bat lagun aritu ziren auzolanean. Orain, lanak bukatzera joateko deialdia egin dute. Zapatu honetan, urtarrilaren 25ean zuten Sargoatera igotzeko asmoa, baina eguraldi irgarpena txarra dela-eta, otsailaren 8ra atzeratu dute irteera. Izena emateko e-posta bat idatzi behar da honako helbidera: morkaiko@morkaiko.net. Morkaikok Errosario kalean duen egoitzan ere eman daiteke izena, astelehenetan eta eguenetan, 19:00etatik 20:30era. Gipuzkoako Foru Aldundiaren eta IK4-Ideko enpresaren dirulaguntzak jaso dituzte iturria berreskuratzeko lanetan.

Interes berezia duten mendi inguruak auzolanean berreskuratzeko proiektuari eta Sargoateko iturriari buruzko informazio osoagoa: www.morkaiko.net/sargoate-iturria/

•Xoxotera mendi irteera
Urtarrilaren 26an, domekan, Xoxotera (913 m.) irteera antolatu du Morkaikok, Herri Eskola eta Ikastolarekin elkarlanean. Aittolako parkineraino autoz igoko direla jakinarazi dute, eta handik Xoxoteko aterpetxeraino dagoen bidea oinez egingo dute.

Otsailaren 15erako, berriz, mendia eta sagardotegia uztartuko dituen irteera antolatu du mendi taldeak. Autobusez Hernani Astigarraga ingurura joango dira Urdaburu mendia igo eta jaitsi ostean sagardotegi batean bazkalduko dute.

Gizartea Elgoibar