EHko Mus Txapelketa: Cabo eta Hidalgo irabazle Elgoibarren eta Idoeta eta Urbieta Mendaron

elgoibarren.net 2014ko urt. 27a, 12:29
Deskargatu Info Ahotsak :

Euskal Herriko seigarren mus txapelketako kanporaketak jokatu ziren zapatuan Elgoibarren eta Mendaron. Elgoibarren, Unai Cabo eta Mikel Hidalgo izan ziren irabazleak. Mendaron, berriz, Joxe Idoeta eta Agustin Urbieta izan ziren nagusi. Bi bikote irabazleek Gipuzkoako kanporaketan parte hartuko dute, otsailaren 14, 15 eta 16an, Orion.


Unai Cabo eta Mikel Hidalgo garaikurrekin.

Elgoibarren Lanbroa tabernan jokatuko ziren partidak eta sei bikotek parte hartu zuten. Unai Cabok eta Mikel Hidalgok osatutako bikoteak irabazi zuen kanporaketa eta Josu Zialtzeta eta Luis Berdonces sailkatu ziren bigarren postuan, 2011ko kanporaketa irabazi zuen bikotea, hain justu ere. Irabazleek, Gipuzkoako kanporaketa jokatzeko sailkapenaz gainera, Lanbroa tabernak eskainitako lau lagunentzako afaria jaso zuten saritzat. Zialtzetak eta Bedoncesek bi lagunentzako afaria lortu zuten. Era berean, parte hartzaile guztiek Errioxako ardo botila bana jaso zuten.

1706637026128 EHko Mus Txapelketa: Cabo eta Hidalgo irabazle Elgoibarren eta Idoeta eta Urbieta Mend

Mendaron lau bikote aritu ziren lehian Aitz Beltz tabernan jokatu zen kanporaketan. Joxe Idoetak eta Agustin Urbietak irabazi zuten kanporaketa, eta, honenbestez, eurak izango dira Mendaroko ordezkariak Gipuzkoako txapelketan. Parte hartzaileen artean, Aitz Beltzek eskainitako bi lagunentzako afaria zotz egin zuten eta Borja Rodriguez eta Alex Aranberri izan ziren zortedunak. Gainerakoek ardo botila bana eraman zuten etxera.
 Gipuzkoako kanporaketan aurrera egitea lortzen duten bikoteek Euskal Herriko mus txapelketaren finalean parte hartuko dute Heletan (Nafarroa Beherea), martxoaren 8an. Irabazleek 3.000 euro, Karibera bidai bat lau lagunentzat eta txapela jasoko dituzte.
 
 
 
 
Gizartea Elgoibar