Debabarrenako mankomunitateek auzitara eramango du Zubietako errauste plantaren kontratuen etetea

elgoibarren.net 2014ko urt. 28a, 15:16

Arcadio Benitez eta Denis Itxaso Debabarrena eta San Markosko mankomunitateetako presidenteek administrazioarekiko auzi prozesua aurkeztuko dutela epaitegietan iragarri dute gaur Donostian. Gipuzkoako Hondakinen Partzuergoak eta Zubietako errauste planta egitea egokitu zitzaien enpresen artean egin zen kontratu etetearen aurkako errekurtsoa jarriko dutela adierazi dute. Helburua kalte ordainetan “gastatutako hamahiru milioiak berreskuratzea” da. Era berean, Bruselak Gipuzkoako erraustegia ez egiteko erabakia ikertuko du.

San Markoseko eta Debabarrenako mankomunitateetako presidenteek, Denis Itxasok eta Arcadio Benitezek, beren presidenteorde Mikel Pagolarekin eta Ricardo Garate elgoibartarrarekin batera, aditzera eman dute ordezkatzen dituzten mankomunitateak ezin direla ezer egin gabe geratu Gipuzkoako Hiri Hondakinen Kudeaketako Plan Integralean (PIGRUG) aurreikusitako azpiegiturak eraikitzeko herritarrek ordaintzen duten dirua “kalte-ordainak emanez xahutu dela ikusita, betiere ordezko azpiegitura bakar bat ere martxan jarri gabe eta hondakinen arazoa Gipuzkoan kolapsoa eragiteko zorian dagoenean”. Bi mankomunitateetako presidenteen arabera, 13 milioi euroko kalte ordainak ordaindu dizkiete enpresei. Gipuzkoako Hondakinen Partzuergoak azaroan azaldu zuenez, zortzi milioi euroren truke moztu zuten exekuzio kontratua. Erabaki horiek Gipuzkoako "interes orokorren aurka" hartu zirela salatu du San Markoseko mankomunitateko presidente Denis Itxasok.

Zubietan erraustegia egiteko lanak bertan behera laga zituzten. Argazkia: EiTB

Arcadio Benitez Debabarrenako mankomunitateko presidenteak adierazi duenez, kuotak igo ziren Zubietako planta finantzatu ahal izateko. "Ez du zentzurik kuota berak kobratzen jarraitzea, lanak geldirik daudenean. Herritarrak ordaintzen ari dira planta egiten ariko balitz bezala". Benitezek argitu duenez, GHKri hondakin tona bakoitzeko 145 euroko tarifa ordaintzen dio mankomunitateak. Itxasok nabarmendu du “Ez dela zilegi mankomunitateek eta herritarrek zintzo ordaintzea eta GHKk ez betetzea berari dagokion zatia, Gipuzkoa azpiegiturarik gabe utzita eta dirua xahututa herritarren bizkar emandako kalte-ordainetan”.

Benitez eta Itxasoren esanetan, deskribatutako egoera are larriagoa da kontuan izanik Zubietako azpiegituren esleipendunei 13 milioiak ordaintzeko erabakia GHK-ko teknikarien txosten tekniko, ekonomiko eta juridikoetan bildutako irizpideen kontra eta EAEko Batzorde Juridiko Aholku Emailearen (COJUA) aurrean aurkeztutako kontratuen deuseztasun demanda kenduta hartu dela, “garbi zutelako emaitza ez zela beren interesen aldekoa izango". San Markoseko mankomunitateko presidenteak, bestalde, gaineratu du GHK-k "entzungor" egin diola Gipuzkoako Batzar Nagusietan adierazitako borondateari: "PRGRUG plana garatzen duen Foru arauari eta horren aurrerapen-agiriari".

Debabarrenako eta San Markosko presidenteek nabarmendu dutenez, epaitegien erantzuna legealdi hau pasatu eta gero iritsi daiteke. Epaitegiek bi mankomunitateei arrazoia emango balie, Itxasok uste du errauste planta egiteko kontratua berriro martxan legokeela.

•Bruselak erabakia ikertuko du

GHK-k Zubietako Erraustegiaren lanen exekuzioa etetea erabaki zuen 2013ko uztailaren 12an.

Debabarrena eta San Markosko mankomunitateek jarritako salaketaren harira, Bruselak Gipuzkoako erraustegia ez egiteko erabakia ikertuko duela iragarri du. Europako Inbertsio Bankuak diru-laguntza eman zuen erraustegia eraikitzeko, eta ez egiteko erabakiaren berri ofizialik jaso ez duenez, ikertu egingo dute erabakia. Gainera, Gipuzkoako Foru Aldundiak hondakinak kudeatzeko aukeratu duen sistema ere ikertuko dutela iragarri dute. EAJ alderdiak egindako galdera batek eragin du ikerketa. (iturria: eitb.com)

Gizartea Elgoibar