Martin Hernandezek bigarren postua lortu du Donostiako Nazioarteko Krosean, infantiletan

 

 

 59. Donostiako Nazioarteko Krosa jokatu zen joan den domekan Lasarteko hipodromoan. Joseph Ebuya eta Milcah Chemos keniarrek irabazi zituzten senior mailetako gizonezkoen eta emakumezkoen lasterketak. Gure ordezkariek, baina, behe-mailetako probetan parte hartu zuten, infantil mutilen lasterketan, hain zuzen ere. Martin Hernandezek podiumera igotzea lortu zuen proba horretan, bigarren postuan ailegatu zen-eta helmugara. Emaitza oso onak lortzen ari da Hernandez kros denboraldian, joan den urtarrilaren 12an, esaterako, bosgarren postuan sailkatu zen Elgoibarren, Nazioarteko Juan Mugertza krosean. Zarautzen jokatu zen denboraldiko estreinako lasterketan ere garaipena lortu zuen, eta baita Espainiako Konstituzioaren Nazioartekokrosean ere, Alcobendasen.

Hernandezez gainera, Markel Zabalak, Ander Armendiak eta Aner Gallastegik ere korrika egin zuten Lasarten, infantilen lasterketan, eta laurek lortutako postuei esker, hirugarren postuan sailkatu zen Mintxeta Atletismo Taldea taldeka eta Arreiturre Institutuak lehen postua lortu zuen ikastetxeen sailkapenean. Guztira 57 antxitxikarik parte hartu zuten infantilen lasterketan. 

 

∞Lotura duten albisteak:

• Alcobendaseko krosean parte hartu dute Mintxetako 35 korrikalarik (2013-11-26)
• Emaitza onak lortu dituzte Mintxetako atletek kros denboraldiko estreinako lasterketan (2013-11-05)