Kiroldegirako sarrera hobetuko du Udalak

elgoibarren.net 2014ko urt. 30a, 17:10

Ezintasunen bat dutenentzako eta umetxoen aulkientzako sarrera berezia eraikiko du Udalak Olaizaga kiroldegira sartzeko sarrera nagusian. Era berean, kiroldegian aurten egingo dituzten hobekuntza lan gehiago ere iragarri dituzte.

Olaizaga kiroldegiko sarrera nagusia.

Elgoibarko Udaleko arduradunen esanetan, Olaizaga kiroldegiko sarreran dauden eskailerak ez dira batere egokiak. Hori dela-eta, eta irisgarritasun neurriak betez, "ezintasun bat dutenentzako eta umetxoen aulkientzako sarrera berezia" egingo dute. Arrapala bat, hain justu ere. Muskulazio gelako eta zuzendaritzako bulegoen azpitik pasatuko dela arrapala hori jakinarazi dute, eta gehienez %8ko malda izango duela.

Era berean, kiroldegi barruko igogailua berrituko dute, izan ere, araudi berrietara egokitzeko hainbat berrikuntza behar ditu igogailuak: barruko telefonoa, segurtasun neurri berriak, e.a.

•Elbarrituentzako aldagela igerilekuan
Erabiltzaileen erosotasuna hobetzeko helburuarekin, elbarrituentzako aldagela bat eraikiko dute Olaizaga kiroldegiko igerilekuan. Armairuen ondoan eraikiko dute zazpi metro koadroko aldagela, kiroldegira gurpildun aulkian joaten direnek erabil dezaten. Horrez gainera, aldagelan dutxa berezia jarriko dute.

Udala Elgoibar