Etxegiña taldearekin 75 lagun ibili ziren kantuan Elgoibarko kaleetan. Aterkia esku batean eta makilan bestean, bi taldetan banatuta zeharkatu zituzten herriko kale eta auzoak. San Lazaro zaharren egoitzara ere egin zuten bisitaldia. Errosarioko amabirjinaren aurrean Salbea abestu ostean guztiek elkarrekin bazkaldu zuten Baltasar elkartean.
Mendaron, berriz, hiru taldetan banatuta irten ziren kantura, eta herriko kale eta baserri guztiak koplatu zituzten, Beñat Lizaso, Gregorio Larrañaga “Mañukorta”, Beñat Ugartetxea, Juanito Loiola, Aitzol Urain “Bidaburu” bertsolariek lagunduta. Amaieran, Aizpe gastronomia elkartean bazkaldu zuten guztiek elkarrekin, eta bazkalostean, omenaldi
xumea egin zieten urteetan santa eskean ibili diren hainbat laguni:
Jabier Urbieta "Billale", Juanito Loiola "Lasalde", Isidro Astorkia "Olabaza",
Sabin Longarte, Manuel Loiola "Panizo", Bitoriano Loiola "Ospas" eta Iñaki
Elortza "Kortabarri".
Aurten 2.790 euro batu dituzte, eta iaz bezela Ameikutz Musika Eskolari emango diote dirua.
•Elgoibarko Izarrakoak martitzenean
Ohitura zaharrari jarraituz, Elgoibarko Izarrako kideak Santa Ageda bezpera egunean, otsailaren 4an, irtengo dira baserriz-baserri kopla kantari. 14:30ean batuko dira Kalegoen plazan, eta gauera arte jardungo dute kopla kantari.
•Santa Ageda ikastetxeetan
Ikastetxeetan ere ospatuko dute Santa Ageda bezpera, otsailaren 4an. Elgoibar ikastolakoak 15:30ean irtengo dira ikastetxetik eta Kalegoen plazaraino joango dira kantuan (euria egiten badu ikastolan ospatuko dute). Herri Eskolakoek ikastetxean bertan jardungo dute kopla kantuan. Mendaron bestalde, Ospitala, Herriko Enparantza, eta Azpilgoeta koplatuko dituzte. Bukaeran, 12:00etan, Mendarozabalen abestuko dute denek batera, bi urtekoek ezik.
ARGAZKIAK: 2014ko santa eskea.
∞Lotura duten albisteak:
