Maalako parkea estaltzeko ideia lehiaketa: 3TF3 izeneko proiektua da herritarren gustokoena

elgoibarren.net 2014ko ots. 5a, 21:23
Deskargatu Info Ahotsak :

Maalako parkea estaltzeko lehiaketara aurkeztutako zortzi egitasmoak jendaurrean ikusgai egon dira gaur arte Kultur Etxean. Egitasmo gustukoena bozkatzeko aukera izan dute bertan herritarrek. Gaur zenbatu dituzte boto kutxan jasotako botoak, 638 orotara, eta 3TF3 izeneko aurreproiektuak jaso du boto gehien: 196 boto. Txertoa izeneko lana izan da bigarren bozkatuena, 121 botorekin, eta Hegoak ebaki banizkio izenekoak 103 jaso ditu. Gogoan izan, herritarren botoak %20ko balioa izango duela azken erabakian.


Udal ordezkariak botoak zenbatzen.

Maalako parkea estaltzeko asmoa du Elgoibarko Udalak eta lehiaketara aurkeztu du proiektua. Elgoibarko sei arkitektuk aurkeztu dituzte lanak, zortzi egitasmo guztira. Aurkeztutako lanak Kultur Etxeko erakusketa gelan egon dira erakusgai, joan den urtarrilaren 22tik gaur arte, hain justu ere. Erakusketara hurbildu diren 18 urtez gorakoek proiektu gustukoena bozkatzeko aukera izan dute. Azkenean 638 izan dira botoa eman duten lagunak, hau da, erroldatutako elgoibartarren %6,5ak.
  Herriko ingeniari edo arkitektoa izatea, edo Elgoibarren lan egitea jarri zuen Elgoibarko Udalak baldintzatzat, lanak aurkezteko. Proiektua aukeratzeko aintzat hartuko dituzten irizpideak ere zerrendatu zituzten, eta irizpide horietako bakoitzak zenbateko balioa izango duen ere bai: proposamenaren prezioa (irizpide honi puntuazio orokorraren %30 emango zaio), herritarren botoak (%20), ingurura nola egokitzen den (%20), egitura mantentzeak zer kostu suposatuko duen gerora begira (%15), eta gaur egun parkeari ematen zaizkion erabileretara nola egokitzen den (%15). Otsailaren 10eko astean batuko da epaimahai.

1706637018683 Maalako parkea estaltzeko ideia lehiaketa: 3TF3 izeneko proiektua da herritarren gusto

1706637018780 Maalako parkea estaltzeko ideia lehiaketa: 3TF3 izeneko proiektua da herritarren gusto
 Proiektu irabazlearen egileak proiektua idazteko enkargua jasoko du saritzat. Bigarren proiektu onena, berriz, 3.000 eurorekin sarituko dute, eta hirugarren proiektu onena, 2.000 eurorekin. Rikardo Garate Elgoibarko Udaleko Hirigintza zinegotziak aurreratu du nahiko luketela udarako estalpea prest egotea. Hori hala izan dadin, otsaila bukaerarako esleituko dituzte lanak, eta maiatzean obrak hasteko moduan izango dira, Garateren esanetan.
 
 
 
 
 
Gizartea Elgoibar