Iosu Gabilondo arkitektoak aurkeztutako proiektua aukeratu dute Maalako parkea estaltzeko

elgoibarren.net 2014ko ots. 14a, 14:56
Deskargatu Info Ahotsak :
Español English Français Català Galego

Hegoak ebaki banizkio izeneko aurreproiektuak irabazi du Maalako estalpea aukeratzeko Udalak antolatu duen ideia lehiaketa. Iosu Gabilondo arkitekto elgoibartarra da proiektu irabazlearen egilea eta, hortaz, berak izango du obraren behin betiko proiektua idazteko eta lanak zuzentzeko ardura, horixe zen-eta irabazlearentzako saria. Bigarren proiektu onena Ion Zubiaurrek aurkeztutako 3TF3 aukeratu dute, herritarren boto gehien jaso zituen proiektu bera. 3.000 eurorekin saritu dute.


 Hirugarren geratu den ideia edo aurreproiektua ere Ion Zubiaurrek aurkeztu zuen. Plic izenekoa lana, hain zuzen ere. Horrenbestez, bigarren eta hirugarren sariak eskuratu ditu Ion Zubiaurre Ros arkitekto elgoibartarrak. Hirugarren saria 2.000 eurorekin saritu du Udalak.
•Erabakia "aho batez"

Proiektu irabazlearen ikuspegia.

Udal arduradunek jakinarazitakoaren arabera, lehia estua egon den arren, Udaleko teknikari eta ordezkariz osatutako epaimahaiak “aho batez” aukeratu zuen proiektu irabazlea: Hegoak ebaki banizkio izeneko aurreproiektua. “Herritarrek euren ideia gustukoena aukeratzeko modua izan zutenean hirugarren bozkatuena izan zen, eta epaimahaikideentzat erregularrena zen, gainerako lehiakideen gainetik egon baita kontutan hartzen ziren irizpide gehienetan: ingurura nola egokitzen den, egitura mantentzeak zer kostu izango duen gerora begira, gaur egun parkeari ematen zaizkion erabileretara nola egokitzen den, prezioa eta argitasuna, besteak beste”, azaldu du Elgoibarko alkate Alfredo Etxeberriak Iosu Gabilondoren egitasmoaz. Era berean, arkitektoek aurkeztutako memoriari garrantzi handia eman diote, hau da, dokumentazio osoena aurkeztu duten lanek puntuazio altuagoa jaso dute. “Gauza asko hartu dira kontutan. Ez da erabaki erraza izan, baina irabazlearekin ere ez da zalantzarik izan".
  Maalako parkea estaltzeko proiektuak 300.000 euroko aurrekontua du. Alkatearen esanetan aurkeztutako aurreproiektu guztiak zeuden kopuru horren azpitik, "bat izan ezik".
•Udarako prest
 Rikardo Garate Elgoibarko Udaleko Hirigintza zinegotziak aurreratu du nahiko luketela udarako estalpea prest egotea. “Lanak esleitu, jendaurrean jarri, epeak bete behar ditugu eta ibilbide luze du oraindik egitasmoak, baina ahalegin guztiak egingo ditugu udarako prest egon dadin estalpea”.

'3TF3', bigarren saria.

'PLIC', hirugarren saria.
 
 
 
Gizartea Elgoibar