Elgoibarko alkate Alfredo Etxeberria jakinarazi duenez, ikurrinari gorazarre egiteaz gainera, “zeharka” bada ere, EAEko Auzitegi Nagusiak Espainiako bandera udaletxeko fatxada nagusian jartzeko emandako agindua salatuko dute ‘Geurea ikurrina’ ekitaldian. EAJ eta EHBildu udal taldeek Auzitegi Nagusiaren epaia salatzeko mozioa aurkeztu zuten otsailaren 17an ospatu zen udalbatzarrean, eta onartu egin zuten. Mozio horretako puntuetako bat da ikurrina omentzeko antolatutako ekitaldia.
•Plaka bat eta 1977ko ikurrina
Bi zati izango ditu barixakuan egingo duten ekitaldi instituzionalak. Lehenengo zatian, plaka bat ipiniko dute Kalegoen plazan; ez dute lekua zehaztu. Elgoibarko Udalak ikurrinaren inguruko bi mozio onartu zituen 1977an eta 2012an, eta horietan ageri diren pare bat esaldi idatzita izango ditu plakak.
Bigarren zatian, berriz, Elgoibarko udaletxeko balkoian jarri zuten lehenengo ikurrina, koadro baten barruan sartuta, udaletxeko pareta batean zintzilikatuko dute, pleno aretora igotzeko eskaileren alboko paretan, hain justu ere.
Ikurrinak dituen balioak “goraipatzea” dela 'Geurea ikurriña' ekitaldiaren helburua argitu du Alfredo Etxeberriak. “Inork ez du zalantzan jartzen erkidego honi egin dion ekarpena. Aho batez onartutako ikurra da, denok identifikatzen gara berarekin eta horrek on egiten dio bizikidetzari”, esan du.
∞Lotura duten labisteak:
- Espainiako Bandera udaletxeko fatxada nagusian jartzera behartu du Udala Auzitegi Nagusiak (2014-02-18)
- Elgoibarko Udalak apelazio helegitea aurkeztu du ‘banderen auzian’ (2013-02-28)
- Espainiako bandera “Elgoibartar gehienon nahiaren aurka” jarri dutela zehaztu du Udalak (2012-04-16)
- Espainiako bandera jarriko dute udaletxean, EAEko Auzitegi Nagusiak aginduta (2012-03-21)
- Udaletxeko balkoian espainiar banderarik eta ikurrinik ez dagoelako kezkatuta 'El Mundo' egunkarian (2007-11-27)
- Legebiltzarrak Espainiako bandera erakunde guztietan jartzea eskatu du (eitb.com)