Hiri hondakinen kudeaketaren harira Udalak egindako balorazio positiboa kritikatu du EHBilduk

elgoibarren.net 2014ko mar. 6a, 14:19
Deskargatu Info Ahotsak :
es en fr

EHBilduk kontu hartu dio Elgoibarko Udalari hondakinen gaian. Joan zen astean Alfredo Etxeberria alkateak hiri hondakinen kudeaketaren inguruan egindako balorazioa gogor kritikatu du koalizioak, eta esan du hondakinen inguruko datuek alkateak emandakoaz oso bestelako errealitatea erakusten dutela: Europak 2016rako ezarritako helburutik [hondakinen %60 birziklatzea eskatzen du] "oso urrun" dagoela Elgoibar.


 Bi datu nabarmendu zituen joan zen astean Alfredo Etxeberriak: batetik, 2013an hondakinen %34,8 bildu zela Elgoibarren gaika, eta bestetik, Elgoibarko etxebizitzen %62tan dutela bosgarren edukiontzia.

 Horren harira, EHBilduk esan du ez dagoela pozteko arrazoirik, sortzen ditugun hondakinen %80 birziklagarria izanda, "gehiena" zabortegira botatzen delako. "Elgoibartarrok inguruko herritarrek baino gehiago birziklatzen dugu, baina hondakin gehiago sortzen dugunez besteak baino zabor gehiago ari gara botatzen zabortegira", adierazi dute. Datuak ere eman dituzte {ikusi goiko grafikoan}: elgoibartar batek, batez beste, 424 kilo hondakin sortzen ditu, eta horietatik 284 kilo doaz zabortegira; eskualdeko beste herrietakoek botatzen dutena baino %11 gehiago, koalizioaren arabera.

•Gaikako bilketan aurrerapausorik ez

Gaikako bilketa hilabetez hilabete. Iturria: EHBildu.

Gaikako bilketari dagokionean aurrerapausorik ez dela egon salatu du EHBilduk, alkateak esandakoaz bestera. Debabarrenako mankomunitateak emandako datuak eskuan, Etxeberriak esan zuen urtebetean %22tik %33,46ra igo zela gaika bildutakoa, baina datuen azaleko balorazioa egitea egotzi dio koalizioak. Igoera hori hilabetez hilabete aztertuz gero, errealitatea beste bat dela adierazi dute: hau da, igoera handiena, %19tik %30era artekoa, bosgarren edukiontzia jarri eta hasierako hilabeteetan eman zela, eta ordutik ez dela aurrera egin. "Azken hamar hilabeteetan ez da igoerarik egon, emaitzak ez dute ez aurrera ez atzera egin. Datu horiek ez digute, beraz, baikorrak izateko arrazoirik ematen", azaldu du Jose Luis Ibartzabalek Miren Arrate Arrietarekin batera eskaini duen prentsaurrekoan.  
•Bosgarren edukiontzia

Gaikako bilketaren emaitzak.

Udalak bosgarren edukiontziaren harira esandakoak ere kritikatu ditu EHBilduk. koalizioaren arabera, hondakin organikoarentzako edukiontzia dutenak barik erabiltzen dutenak hartu behar dira aintzat, eta horiek elgoibartarren %33 direla nabarmendu dute. "Hiruko erregela xinple bat egitea nahikoa dugu hori jakiteko", esan du Jose Luis Ibartzabalek. Eta honela azaldu du: "Mankomunitatearen datuen arabera, batez beste elgoibartar bakoitzak urtean zehar 30 kilo botatzen ditu bosgarren edukiontzian. Atez ate ezarrita dauden herrietan 90 kilo biltzen dituzte. Beraz ondorioa garbia da: elgoibartarren %33ak bakarrik erabiltzen du bosgarren edukiontzia”. Horren harira esan dute, bosgarren edukiontzia jarri izanak ez duela ekarri herritarrek gainerako edukiontziak ondo erabiltzea.
 
∞Lotura duten albisteak:
 
Gizartea Elgoibar