Pastelgintza artisaua sustatzeko eta aldi berean bezeroei
eurekiko duten lehialtasuna eskertzeko, pastel erraldoi bat osatuko dute
zapatuan (martxoak 29) Elgoibarren Gipuzkoako zazpi gozogile ezagunek,
tartean Elgoibarko Muruamendiaraz gozotegikoek (ondoko aragazkian). Gorringo xigortudun
bizkotxo tarta izango da, eta guztira, 1.300-1.500 razio artean banatuko
dituzte, debalde, Muruamendiaraz goxotegiko Juanjo Baztarrika
pastelgileak aurreratu duenez. Bizkotxo tartarekin batera, gainera,
txokolate beroa ere banatuko dute.
Bizkotxo tarta erraldoia egiteko 510 arrautza, 24 kilo azukre, hamabi kilo eta erdi irin eta 25 litro esne beharko dituztela kalkulatu dute gozogileek. Sei laguneko taldea baino handiagoa topatuko du lanean zapatuan 17:00etatik aurrera Kalegoen plazara gerturatzen denak.
•Pastelak taldea
Zazpi dira, esan bezala, ekimen honetan parte hartuko dute gozogileak: Donostiako Geltoki eta Barrenetxe, Tolosako Gorrotxategi, Ordiziko Unanue, Zarauzko Sayalero, Azpeitiko Egaña eta Elgoibarko Muruamendiaraz. Pastelak taldea osatzen dute guztiek, eta helburu batek elkartzen ditu: gozogintza artisaua ezagutarazi eta bultzatu nahiak. Krisiak goxogintzan dihardutenei ere eragin diela ohartarazi dute, eta horrek eraman dituela elkartzera. "Ez dago garai bateko bizipozik kalean. Guk zorionez eusten diogu, baina bezeroei esan nahi diegu hor gaituztela. Zerbait gehiago ordaindu behar dela gurea? Bai, baina eguneko lana da gurea, eta eguneko produktuak erabiltzen ditugu", nabarmendu du.
•44 bat bizkotxo tarta Pastelak taldeak ez du berez elkarte izaerarik; gehiago da tarteka hitz egiteko eta elkarrekin gauzak egiteko batzen den taldea. Pastelgintza artisaua sustatzeko ekin zioten pastel erraldoiak egiteari, eta biharkoa kalean egingo duten hirugarrena da. Donostian egin zuten aurrenekoa, arraun itxurako tarta handi bat, eta Azpeitian bigarrena, sagar tarta erraldoia. Bi kasu horietan lanik handiena pastelgintzako lantegian egin zuten, nork bere partea, eta kalean bukatu zuten gero. Hala egingo dute zapatuan Elgoibarren ere. "Lana banatu egingo dugu. 44 bat bizkotxo tarta egin behar dira, 30x20 tamainakoak, eta horiek banatu egingo ditugu. Gure eguneko lanak bukatutakoan egingo ditugu horiek, eta zapatu arratsaldean bost edo sei pastelgile ariko gara horiek mahaietan jarri, gorringoa zabaldu, azukrea bota eta erretzen".
