Gaur arratsaldean hasiko da Elgoibarko seigarren pintxo lehiaketa

elgoibarren.net 2014ko eka. 10a, 16:33
Deskargatu Info Ahotsak :

 
Gaurtik barixakura bitartean tabernariek espresuki lehiaketarako aurkeztutako pintxoak dastatzeko aukera izango da Elgoibarren. Aurten 32 tabernak hartu dute parte Elgoibarko seigarren lehiaketan. Epaimahaikideak (ondoko argazkian) eskuak bete lan ibiliko dira egunotan.


 Inoiz baino taberna gehiagok hartuko dute parte aurten Elgoibarko pintxo lehiaketan, eta honenbestez, zaila izango da lehiaketara aurkeztu dituzten pintxo guztiak, 32 guztira, probatzea. Hala egin nahi dutenek gaurtik (ekainak 10) barixakura bitartean izango dute aukera. 35,2 euroan osatu daiteke pintxo guztien ‘dastatzeko menua’, pintxo bakoitza 1,10 euroan salduko dute-eta.
•Elgoibarko VI. Pintxo Lehiaketa; egunak eta ordutegia:
  • Ekainaren 10ean, 11n eta 12an (asteartea, asteazkena eta osteguna) 19:00etatik 22:00etara.
  • Ekainaren 13an (ostirala) 12:00etatik 15:00etara eta 19:00etatik 22:00etara.
•Hiru sari banatuko dira:
  1. Elgoibarko pintxo onenaren saria.
  2. “Baserrikoa” pintxoaren saria (lau pintxok betetzen dituzte baldintzak)
  3. Herritarren saria; azken hau pintxoa dastatzen duen jendearen botuen bitartez aukeratuko da. Gainera, botua ematen duten guztien artean, Belaustegi Jatetxeak eskainitako dastaketa menu bat zozketatuko da.
•Txarriduna sarituena
  Iaz, Txarriduna jatetxeak irabazi zuen pintxo lehiaketa. Orain arte jokatu diren bost ediziotatik hiru irabazi ditu Txarridunak {2009koa, 2010ekoa eta 2013koa}. Herritarren saria, berriz, Sigma jatetxeak eskuratu zuen iaz, eta Elgoibarko baserriko produktuekin eginiko pintxo onenaren saria, bestalde, Ibai-Ondo jatetxeak jaso zuen.

∞Lotura duten albisteak:

 
Gizartea Elgoibar