Urtero bezala Trinitateetako azoka bereziak hasiko ditu jaiak Elgoibarren. Zapatu goizean Elgoibarko baserrietako produktuak eta abereak jarriko dituzte ikusgai Lekuederren eta Aita Agirre plazan, eta horrekin batera, kalitatezko produktuak dastatzeko aukera ere egongo da. Eguerdian, emakumeen arteko trontza txapelketa eta lokotx biltze erakustaldia egingo dituzte Kalegoen plazan. Zapatu arratsaldean dantza jaialdia eskainiko dute Inazio Bereziartua musika eskolako dantza ikasleek Haritz dantza taldeko kideekin eta Udaleko txistulariekin batera, eta gauean danbor hotsak iritsiko dira.
•“Aspaldiko karroza ikusgarrienetakoa”
Atabal elkarteko Juan Karlos Arrietak aurreratu duenez, “aspaldiko karroza ikusgarrienetakoa” ikusteko aukera izango dute bihar elgoibartarrek. Lau urtean behin Getarian, Juan Sebastian Elkano itsas gizonaren jaioterrian, Elkanoren lehorreratzea antzeztu ohi dute, eta horixe hartu du, hain zuzen ere, gaitzat Atabal elkarteak aurtengo danborradarako.
Atabal elkartearen aurtengo omenduak, berriz, Asier Makazaga zena eta Elgoibarko makina-erreminta izango dira. Asier Makazaga danborradako kidea zen, eta hura gogoan, oroigarri bat emango diete Makazagaren senideei. Omendu nagusia, berriz, makina-erreminta izango da, eta Pedro Ortuondo museoko zuzendariak jasoko du oroigarria.
Domeka goizean, berriz, umeek hartuko dituzte kaleak, eta haien eskutik etorriko dira danbor hotsak eta artisauek euren lanak erakutsiko dituzte Lekuederren.
•Trinitateak Mendaron
- Informazio osoagoa: BARREN 911. zenbakia (2014-06-13) - PDF
- EGITARAUA: 2014ko Trinitate jaiak Elgoibarren eta Mendaron
ARGAZKIAK: 2013ko Trinitate jaiak.