Elgoibartarren eta mendaroarren emaitzak Hiru Handiak mendi zeharkaldian

elgoibarren.net 2014ko eka. 17a, 14:13

Aurten 1.725 parte hartzaile izan ditu bi urtean behin egiten den Hiru Handiak mendi zeharkaldiak, eta horietatik erdiek baino pixkatxo bat gehiagok lortu zuten Araiako helmugara iristea, tartean hogeita hiru elgoibartarrek eta mendaroar batek. Eta, hain justu ere, parte hartzaile mendaroar bakarra izan da gure ordezkarien artean denbora onena egin duena. Gotzon Zulaikak 76. egin zuen sailkapen nagusian, 13:44:32ko denborarekin. Elgoibarko Ideko expresan lan egiten duen Javi Domínguez gasteiztarrak irabazi zuen proba. (sailkapenak eta argazkiak dauzka)

Distantzia luzeko mendi lasterketen aitzindaria da gurean Hiru Handiak mendi zeharkaldia (1986an jokatu zen aurrenekoz). 100 kilometroko ibilbidea osatu behar zuten partehartzaileek eta ia 10.000 metroko desnibel metatua gainditu, tartean Araba, Gipuzkoa eta Bizkaiko hiru mendi mitikoenak zeharkatuta: Gorbeia, Anboto eta Aizkorri.
Gizonezkoetan, Idekon lan egiten duen Javi Dominguez gasteiztarrak irabazi zuen 19. Hiru Handiak mendi zeharkaldia (11 ordu), eta emakumezkoetan, Silvia Trigueros bizkaitarrak (12:48).
Gure ordezkarien artean, berriz, Gotzon Zulaika mendaroarra izan zen helmugaratzen lehenengoa, 13:44:32ko denborarekin. Sailkapen nagusian, 76. egin zuen. Aurreko bi edizioetan (2012an eta 2010ean) beroak baldintzatu zuen proba, baina aurten mendian ibiltzeko eguraldi egokia izan dute, eta hori dela-eta denbora hobeak egin dituzte parte hartzaile gehienek, baita gure ordezkariek ere.

•Proba bukatu zuten elgoibartar eta mendaroarrak (sailkapen nagusia)