Musika elektronikoak hartuko du Albitzuriko industrigunea uztailaren 5ean

elgoibarren.net 2014ko eka. 27a, 10:32
Deskargatu Info Ahotsak :

Musika elektronikoa izango da nagusi Elgoibar Dance Festival jaialdian. Albitzuri industriagunean egingo dute uztailaren 5ean eta hamabost DJ inguruk hartuko dute parte hamabi orduko musika elektronikoari buruzko jaialdian, tartean David MK eta Khris Rios elgoibartarrek (ondoko argazkian). Antolatzaileen esanetan kartela “bikaina eta bakarra” izango da eta Espainia iparraldeko DJ “onenak” etorriko dira Elgoibarrea.


 Kida Events elkarteko David MK eta Khris Rios DJ elgoibartarrek antolatu dute Elgoibar Dance Festival jaialdia, Txarridunaren laguntzaz. Orain dela zazpi urte hasi ziren musika elektronikoari buruzko jaialdia antolatzeko lanetan, baina finantzazio arazoak medio, ezin izan dute orain arte antolatu.
 Euskal Herriko antzoki ezagunenetan pintxatzen duten DJak etorriko dira Elgoibarrera. Asko gainera, Elgoibarren ezagunak dira, izan ere, Guass dantzalekuan eman zituzten-eta lehen urratsak. Iñigo Diaz Kriptonita, Patt eta Carlos Gonzalez ezagunak egingo zaizkie elgoibartar askori, eta horiekin batera, Juanan, B. Gutierrez, David MK eta Khris Rios elgoibartarrek ere parte hartuko dute jaialdian, beste hainbat DJrekin batera.

•Eguzkia gai nagusia

Elgoibar Dance Festival jaialdiko kartela.

15:00etan hasi eta goizaldeko hirurak aldera arte, beraz, musika elektronikoak hartuko du Albitzuriko industrigunea uztailaren 5ean. Egun argiz hasi, eta gaueko iluntasunean amaituko da jaia, eta kontraste horretan oinarrituko dute jaialdiaren xarma. Eguzkia izango da gai nagusia, eta eguzkipean ezer ez da berdin lema erabiliko dute jaialdirako. Belgikako Tomorrowland jaialdira begira jarri dira, eta haren estiloan antolatuko dute eszenatokia. Sorpresak egongo direla aurreratu dute antolatzaileek, eta herritar guztiei egin diete Albitxurira joateko deia.
•Sarrerak, salgai
  Sarrerak salgai daude dagoeneko, 15 euroan. Txarridunan, Eibarko Oishi tabernan edo Ermuko Sagarran eros daitezke, eta Internetez edf.ticketbox.es helbidean. Egunean bertan ere erosi ahal izango dira, 18 euroan. Sarrera erosten dutenei kamiseta bana oparituko diete.

 

 

 

Kultura Elgoibar