Elgoibarko EHBilduk ez du uste 2013ko eta 2014ko datuak direnik alderatu beharrekoak, hondakinen gaikako bilketaren emaitzak onak ala txarrak diren baloratzeko. Alfredo Etxeberriak emandako azken azalpenen inguruan duten iritzia azaltzeko matematikara jo dute. "Alkateak dio alderatu behar diren datuak 2013ko eta 2014ko datuak direla eta 2014ko urtarriletik apirilerako datuen irakurketa egitea ez dela zuzena. Arrazoia du, helburua urte batetik bestera nola aldatu diren emaitzak ikustea baldin bada. Baina 2014ko emaitzen bilakaera baldin bada aztertu nahi duguna, nola ausartu daiteke oker gabiltzala esatera? Zer proposatzen digu Alfredok, ondorioak ateratzeko abendura arte zain egotea?", dio EHBilduk.
Prentsa ohar bidez azaldu duten bigarren "xehetasun" matematikoa honakoa da: "urtarrileko emaitzak apirileko emaitzekin konparatzea ez daukala oinarririk esaten du {Alfredo Etxeberriak}, urtarrilean, Gabonak medio, apirilean baino hondakin gehiago sortzen delako. Zertarako pentsatzen du alkateak daudela hain erabiliak diren ehunekoak? Estatistikak apaintzeko edota zuzenean konparatu ezin diren datuak konparatu ahal izateko? Gainera Elgoibarko datuen jaitsiera gure irakurketa okerraren ondorioa balira nola esplikatu epe berean Eibarren eta Soraluzen izandako %2 eta %5eko igoerak?".
Xehetasun matematikoekin batera, alkateak EHBildukoen "zintzotasuna eta jokaera" zalantzan jarri izana kritikatu du koalizioak. "Ez da lehenengo aldia erabiltzen dituela horrelako deskalifikazioak benetako eztabaida saihesteko asmoz", adierazi dute.
Proposamen guztiak helburu berdinarekin egin dituztela diote, "Elgoibarren ere Europak birziklapenerako ezarri dituen helburuak garaiz beteko ditugula bermatzea".