Elgoibarko Udalak 2009ko San Bartolome jaietatik ez zuen halako diru kopururik bideratu jaiak antolatzeko. 214.000 eurokoa izan zen orduan aurrekontua eta 171.000 eurorekin osatuko dute aurten egitaraua.
Musikarekin batera, ikuskizun eszenikoek hartuko dituzte kaleak jaietan. Abuztuaren 24an bikoitza izango da eskaintza. Zirkuaren munduan oinarritutako Atlantes ikuskizunak kalejiran zeharkatuko ditu Elgoibarko kaleak arratsaldean, eta gauean Candore ikuskizunaren emanaldia eskainiko du Bambolea konpainiak Kalegoen plazan. Ikuskizuna hasi aurretik, su, argi eta musika ikuskizuna eskainiko du Astondoa etxeak San Bartolome parrokian, duela urte batzuk egin zuten moduan.
•Emakumeak eta industria
Gainerakoan, Elgoibarko emakumeak eta industriari buruzko erakusketa, Bizitza bat, hamaika lan izenekoa, nabarmendu dute udal agintariek. Makina erremintaren mendeurrenaren harira antolatu dute eta abuztuaren 22an inauguratuko dute. Irailaren 20ra arte egongo da ikusgai Kultur Etxeko sotoan.
Soka dantzak ere leku berezia izango du, beste behin ere, San Bartolome jaietan. Izan ere, 1964ko abuztuaren 24an, soka-dantza estreinakoz dantzatu zuten Ongarri elkarteko dantzari eta txistulariak omenduko ditu Udalak, 50 urte pasatu direla-eta. Soka-dantzan parte hartzeaz gainera, bezpera egunean egiten den Salbean ere hartuko dute parte, agintariekin batera.
Abuztuaren 23an hasiko dira jaiak ofizialki, historiagileek udaletxeko balkoitik piztuko duten txupinarekin.
Aurten ere bi asteburutan ospatuko ditugu jaiak eta hiru sokamuturra izango dira: Txiki Egunean, Gazteen Egunean eta Jubilatuen egunean.
- EGITARAUA: 2014ko San Bartolome jaiak (PDF)