Maite Maiorak irabazi du 800 Dukado proba, emakumeen lehen mendi maratoia

elgoibarren.net 2014ko ira. 9a, 14:06

Antolatzaileen esanetan, emakumeei esperientzia paregabea eskaintzeko helburuarekin sortu dute 800 Dukado izeneko mendi lasterketa. Historian estreinakoz soilik emakumezkoena izan den lasterketa honetan 400dik gora emakumek hartu zuten parte eta lasterketa nagusian, mendi maratoian, Maite Maiora mendaroarra izan zen garailea, hiru ordu eta 52 minutuko denborarekin. (audioa eta bideoa dauzka)

Lehendabiziko aldia izan da munduan horrelako gauza bat egiten dena, soilik emakumezkoena izan den mendi lasterketa antolatzea, alegia. Nafarroan jokatu zuten 800 Dukado izeneko proba, Sunbilla, Narbarte, Elorriaga eta Doneztebe artean, hain justu ere.

XVI. Mendean Sunbillan eraiki zuten harrizko zubitik datorkio izena frogari, 800 dukado izan zen-eta Subizarreko Felipek, 1552an, Sunbillako lehen harrizko zubia eraikitzeko egin zuen eskeintza. Aurrez aipaturiko lau herrien artean ordaindu zuten egurrezko zubia ordezkatu zuen harrizko zubia. Nafarroako historian berebiziko interes estrategikoa izan du zubi honek, izan ere, Nafarroa Gipuzkoarekin eta Frantziarekin lotzen zituen Bide Errealean kokatua zegoen. Mendi lasterketa historiko honen bitartez, lau herri horiek elkartu eta zubiak eraiki nahi izan dituzte antolatzaileek, emakumezkoen kirolari bide eta babesa emateko.

1706636553909 Maite Maiorak irabazi du 800 Dukado proba, emakumeen lehen mendi maratoia

Lasterketa berezia eta historikoa izanik, jai giroan joan zela Sunbillara adierazi du Maite Maiorak, baina lehiaz ahaztu gabe. Hala, bera izan zen azkarrena mendi maratoian, eta hiru ordu eta 52 minutuan osatu zuen 42 kilometroko ibilbidea. Lasterketa historiko baten lehen edizioa irabazi duela idatzita ikusteak ilusioa egin diola aitortu du antxitxikari mendaroarrak Euskadi Irratiko Faktoria irratsaioan eginiko adierazpenetan (entzun audioa).
Bideoa (eitb.com):

Kirola Elgoibar