•Epeletan irakurketa tailerra
Elgoibarko Gotzon Garate Udal Liburutegiak Epeletan izeneko irakurketa-tailerra jarri zuen abian iaz, helduen artean euskaraz irakurtzeko zaletasuna sustatzeko. Aurten ere antolatu dute eta gaur (urriak 27) jarriko dute martxan. Antolatzaileek jakitera eman dutenez, “euskal liburuak aisia bihurtzea” da taldearen helburua, eta irakurtzeko zaletasuna duten herritar guztiak deitu dituzte tailerrean parte hartzera. Gaurtik hasita, hileko azken astelehenean batuko dira liburutegian, liburuen irakurketak egin eta irakurritakoari buruzko iritziak partekatzeko. Ordubeteko saioak izango dira, 19:00etatik 20:00etara. Interesatuek liburutegira jo beharko dute izena emateko edo informazio gehiagoren bila.
•Oscar Wilde idazleari buruzko literatura tailerra
Oscar Wilde izango da protagonista Haizea emakume taldeak antolatu duen literatura tailerreko saioan. Oscar Wilde (Dublin, 1854ko urriaren 16a - Paris, 1900eko azaroaren 30a) idazle anglo-irlandarra izan zen. Consuelo Carrerek gidatuko du saioa, Gotzon Garate Udal Liburutegian. Martitzenean (urriak 28) izango da, 18:00etan hasita.
Euskadiko Liburu-denda federazioak sustatuta, liburu-denden festa egingo da datorren urriaren 30ean, eguenean, Araba, Bizkaia eta Gipuzkoako hainbat liburu-dendetan. Elgoibarko Pitxintxu liburu-dendak ere bat egin du festa egunarekin eta idazle elgoibartar bat jarriko dute liburuak saltzen, berak idatzitako liuburuak sinatzen, eta "beharbada" baita ipuinak kontatzen ere. Jasone Osori izango da idazle hori.