Elgoibarko Emakumeen Kontseiluak hainbat ekintza antolatu ditu azaroaren 25erako. Hasteko, Oihulari Klown taldeko kide den Dorleta Kortazar ipuin kontalariak umeentzako saioa eskainiko du Gotzon Garate Udal Liburutegian, 17:00etan. Ondoren, 19:00etan, kontzentrazioa egingo dute Kalegoen plazan, eta gero, Martxa Morea egingo dute. 1,7 kilometroko ibilbidea izango da: Kalegoen plaza - Errosario - San Frantzisko - Maala - Bernardo Ezenarro - San Bartolome - Santa Ana - Ubitarte plaza - San Ignazio - Kalegoen plaza. Ibilbidea korrika, oinez, bizikletan, patinetean edo bakoitzak nahi duen moduan egin dezake. Antolatzaileek arropa morea eramateko eskatu dute. Martxaren ostean, 19:40ean, azaroaren 25eko komunikatua irakurriko dute Kalegoen plazan.
Mendaron, bestalde, umeentzako tailerrak egingo dituzte martitzenean, 17:00etatik aurrera. Ludotekako begiraleen laguntzaz, iman tailerra egingo dute, eta oin markak margotuko dituzte, indarkeriaren kontrako pausoak emanez. 18:30ean, bestalde, pankarta egingo dute Beldur Barik lelopean, eta txapa moreak banatuko dituzte.
•Indarkeriaren prebentzio programa Elgoibarko ikastetxeetan
Indarkeria matxistaren kontrako hausnarketa lantzea eta harreman berriak sortzeko oinarriak jartzea dira Elgoibaro ikastetxeetan egingo duten indarkeriaren prebentzio programaren helburuak. Elgoibarko Institutuko eta Elgoibar ikastolako ikasleei zuzendutako saioak izango dira.