Tertuliak programako talde guztiak dagoeneko martxan badaude ere, atzo, abenduak 3, egin zuten aurtengo ikasturtearen aurkezpen irekia, Kultur Etxeko sotoan.
Aurkezpen-ekitaldia xumea izan zen eta tertuliakideak izan ziren aurkezpeneko protagonistak. 50 lagun pasa bildu ziren Kultur Etxeko sotoan, eta eragileen aurkezpen txiki baten ondoren, Tertuliak programako bidelarien eta bidelagunen txanda ireki zen. Zergatik eman duzue izena programan? Zer eman dizu Tertuliak programak? eta antzerako galderak egin zikieten bidelariei eta bidelagunei, eta horien erantzun zintzoak entzuten joan zen aurkezpenaren zatirik handiena.
2001ean jarri zuten martxan Tertuliak programa, euskaraz berba egiteko laguntza behar dutenei aukera bat eskaintzeko, eta ordutik ez du etenik izan. Programaren koordinatzailea den Ane Goikoetxeak atzo esan zuen moduan, “gutxi eskatu eta asko ematen duen programa da Tertuliak”.
Hauek dira 2015-2016 ikasturteko datu esanguratsuenak:
- a) 40 lagunek hartuko dute parte.
- b) 11 talde osatu dira.
- c) 30 lagun bidelariak dira, euskaraz hitz egiteko laguntza behar dutenak.
- d) 10 lagun dira bidelagunak, bidelariei laguntzeko izena eman dutenak.
- e) 20 bidelarik estreinakoz eman dute izena.
Aurkezpenaren amaieran, Danele Sarriugarte idazle elgoibartarrak tertuliakideentzat bereziki idatzitako testu bat irakurri zuten. Horren ondoren, aurkezpenaren alderdi formalari amaiera eman eta luntxa izan genuen.
Tertuliak programaren eragileak AEK euskaltegia, Udal Euskaltegia, Elgoibarko Izarra eta Elgoibarko Udala dira.
