Nora Kortaberriak Lau Nazioen lagunarteko txapelketa jokatu zuen Espainiako selekzioarekin, joan den asteburuan, Tenerifen. Portugalek irabazi zuen torneoa, eta Espainiako selekzioak jokatu dituen hiru partidak galdu zituen, Portugal, Frantzia eta Alemaniako selekzioen aurka, hain zuzen ere. Kortaberriak erdiko postuan jokatu zituen hiru partidak, eta bost gol sartu zituen guztira. Sagrario Santana hautatzailearen gustukoa izan da jokalari elgoibartarrak eginiko lana eta Poloniara eraman dituen hamasei jokalarien artean sartu du, hiru jokalari baztertu eta gero.
Izan ere, dagoeneko Polonian dago Espainiako selekzioa, datorren asteburuan jokatuko baitute Munduko txapelketarako sailkatze fasea Plock herrian.
•Partidak zuzenean eskainiko dituzte
Kanarietan egin duten prestaketan lortu dituzten emaitzak ikusita ez dira sentsazio hoberenekin joan, baina Sagrario Santana hautatzaileak sailkatzeko aukerak dituztela uste du, eta gainera, oraingoan uztailaren 2tik 15era Errusian jokatuko den Munduko Txapelketarako txartel bat egongo da jokoan. Sari potoloa inondik inora. Lau selekzio lehiatuko dira Polonian eta lehen postuan sailkatzen denak bakarrik lortuko du Errusiara joateko txartela. Barixakuan Eslovakiako selekzioaren aurka jokatuko du Espainiakoak (16:00etan), Poloniaren aurka zapatuan (18:00) eta Turkiaren aurka domekan (12:00). Poloniako federazioak zuzenean eskainiko ditu partida guztiak, streaming bidez, honako webgunean.