Ehun miliako (166 kilometro) ehun lasterketa baino gehiago daude munduan gaur egun, eta horietako bat da Diagonale des Fous, iraupen luzeko mendi lasterkariak erleak eztira moduan erakartzen dituen proba. Indiako Ozeanoko kolonia frantziarra den Reunion uhartean jokatzen da, Afrikan. Aurten parte hartu zuten 2.700 lagunek 167 kilometroko ibilbidea -9.500 metroko desnibela- osatu zuten. Jaitsiera amaigabeak, igoera bertikalak (1.500 metro baino gehiagoko aldapak), oihan txikiak, harbideak, galtzadak eta beste hainbat oztopo gainditu behar izan zituzten antxitxikariek. François D'Haene frantziarrak irabazi zuen proba (23.44.57).
Antoine Guillon frantziarra sailkatu zen bigarren (24.15.12) eta Elgoibarren bizi den Javi Dominguez gasteiztarra sailkatu zen hirugarren (24.36.24). Emaitza honi esker ultra trail lasterketen munduko zirkuituko bigarren postua eskuratu du Dominguezek.
• Urtea borobiltzeko emaitza
Dominguezek adierazi du “zoragarria” izan den urtea borobildu duela Reunion uhartean. “Oso pozik nago. Batetik munduko mendi korrikalari onenak zeudelako Reunionen: Francois d'Hane, Antoine Guillon, Ryan Sandes, Camus.... Eta, bestetik, ultra trail berezienetarikoa delako, bi gauetann korrika egiten dugun ehun milatako proba bakarra baita”. Azaldu duenez, hasieratik joan zen lasterketa buruan, eta 120. kilometro inguruan gorabeherak nabaritu arren, erritmoari eutsi zion. Anoa postuetan trantsizio azkarrak egin eta ahalik eta denbora gutxien galtzea garrantzitsua izan zela nabarmendu du Dominguezek. Puntu horietan, eta ibilbide guztian zehar, Ainhoa Lendinezek emandako laguntza funtsezkoa izan zela azaldu du.
- Informazio gehiago: www.grandraid-reunion.com
- Irakurri hemen: Javi Dominguezek barren.eus-i eskainitako elkarrizketa
