Herriko elkarte, merkatari, taberna, jatetxe eta norbanakoek emandako opariekin prestatu du tonbola Elgoibarko Izarrak. Erakunde publikoen diru-laguntza jasotzen du kultur elkarteak, baina elkartea ekonomikoki bideragarri egiteko erronkari aurre egiteko autofinantzaketa sustatu nahi dute, eta beste hainbat ekintzen artean, Tonbola jarri dute azken lau urteetan Kalegoen plazan. (ikus hemen iaz sarituak izan ziren lagunen argazkiak)
Domekan (abenduak 24), 11:00etatik aurrera salduko dituzte boletoak, eta lautik batek saria izango du. Tonbolaren amaieran telebista baten zozketa egingo dute.
Tonbolarekin batera, txosna ere jarriko du elkarteak Kalegoen plazan bertan. Edanaz gain, taloak eta txorizo egosiak ere salduko dituzte.
