39. Euskadiko Eskolarteko Kirol Jokoak jokatzen dihardute aurten Arabako Murgia herrian. Kros txapelketa jokatu zuten domekan, martxoaren 1ean. Mintxetako infantil nesken taldeak lehen postua eskuratu zuen infantiletan. Ane Agirregomezkortak, Laiane Iraolagoitiak, Nere Arregik, Helene Zubizarretak, Nora Treviñok eta Eider Carok osatu zuten urrea lortu zuen taldea. Mutilen proban lehiatu zen Anwar El Hassouni Benaissa elgoibartarra, Gipuzkoako selekzioa ordezkatuz. Seigaren postuan sailkatu zen, iaz Ortuellan jokatutako Euskadiko kros txapelketan lortu zuen postu berdina, hain zuzen ere.
Anwar El Hasouni Gipuzkoako txapeldunordea da krosean, bigarren egin baitzuen joan den otsailaren 16an Hernanin jokatu zuten txapelketan. Mintxetako alebin nesken taldea (Nerea, Maite, Sara, Maialen, June, Yone eta Ilargik osatua) irabazi zuen taldekako Gipuzkoako txapelketa. Alebin mutilen taldea ere igo zen podiumera, hirugarren koskara, hain justu ere. Honako hauek osatu zuten taldea: Xuban, Elur, Yon eta Unax. Infantil nesken taldeak ere hirugarren egin zuen taldekako sailkapenean, eta halaxe lortu zuten gero irabazi zuten Euskadiko kros txapelketarako sailkatzea.
