Hiru adin tarte banatu dituzte, eta guztira 30 ume eta hogeiren bat guraso ari dira parte hartzen. Atzo izan zuten estreinako saioa, eta beste bi dituzte lotuta ikasturtea amaitu bitarterako.
40 minutuko hiru saio, hilabeteko bat. Hamar ume taldeko, eta hiru adin tarte: HH5etik LH2ra, LH3 eta LH4koak eta LH5 eta LH6koak. Hala aurkeztu zuten, baina izena eman dutenen zerrenda ikusita, taldeak aldatu behar izan dituzte, izena emandakoetako inor kanpoan ez lagatzeko. Atzo izan zuten estreinako saioa, eta maiatzaren 5erako eta ekainaren 2rako lotu dituzte hurrengo biak. Mireia Delgadok gidatzen ditu saioak. Pedagogoa eta antropologoa da ikasketaz Delgado, eta bitartekari literario eta ipuin-kontalari gisa ere aritzen da han-hemen. Delgadorekin, irakurmenari, idazmenari eta literaturari bazter guztietatik egingo diote kilika saio hauetan, euskaratik eta euskaraz.
