Ume eta Nagusien eguna ospatu zuten atzo. Txirristada handia jarri zuten goizean Azpilgoetan, eta atzoko sargoriarekin ederki gozatu zuten hara inguratu ziren haur eta gurasoek. Ondoren, Mendaroko euskal dantza taldeko haur eta nagusien dantza-saioa izan zen frontoian. Berezia izan zen atzokoa. Dantza taldeko kideek beste bultzada bat eman nahi diote euskal dantzari Mendaron, eta 1992an Rogelia Horrillok jositako arropekin irten ziren plazara. Ordubete inguruko saioa egin zuten eta bukaeran, Amaia Aguriagoikoa eta Imanol Arantzamendi dantza-irakasleak, Leonor Barreras taldeko dantzari beteranoena eta Rogelia Horrillo jostuna omendu zituzten. Horrilloren partez haren alaba Nuria Guerolak jaso zuen lore-sorta. Arratsaldean, berriz, haur danborrada izan zuten, Arno Guraso Elkarteak antolatuta, eta iluntze-gaua Lisker taldeak girotu zuen. Ez da lehen aldia Lisker Mendarora etortzen dela eta gustuko dute mendaroarrek, plaza bete lagun jarri baitzuten dantzan eibartarrek.
