Lau dira banatuko dituzten sariak: Erakunde Pribatuaren saria, Erakunde Publikoaren saria, Emakumeak Landa Eremuan saria eta urteetako ibilbideari saria, eta lehenengoa jasotzeko hautagaien artean daude Asier Lizarralde eta Ane Munin elgoibartarrak, Lizagasar Sagartokixa proiektuaren sortzaileak.
Erakunde publikoei dagokionean, sei proiektu daude sarietarako hautatuak eta erakunde pribatuen kasuan bost. Landaola Federazioa osatzen duten Gipuzkoako sei landa garapen agentziek aukeratu dituzte hautagaiak, eta honako hauek dira.
Erakunde Pribatuetan:
- Bordazar baserria
- Ereindajan Bergara ikasbidaiko otarren proiektugatik eta Angiozarko eskolako jangelaren antolaketagatik
- Asier Lizarralde eta Ane Munin Lizagasar, Sagartokixa proiektuagatik
- ERBEL Erle Beltz Hazleen Elkartea
- Ibarbi Errezi Sagarra kooperatiba, elkarte izatetik kooperatiba izatera eman duen urratsagatik.
Erakunde publikoetan, berriz, Hondarribiko, Eibarko, Zumarragako, Amezketako eta Zarauzko udalak eta Zubillaga hiltegia. Beste bi sarien inguruan ez dute ezer aurreratu. Emakumeak Landa Eremuan sariaren bidez, landa eremuan egindako lanagatik, emakume edo emakume elkarti bati egingo diote errekonozimendua, baina egunean bertan jakinaraziko dute zeini. Urteetako Ibilbidea Sariaren bidez, bestalde, Gipuzkoan landa eremua sustatzen duten erakundeek zein pertsonek egindako urteetako ibilbidea sarituko dute. Berastegiko udaletxean banatuko dituzte Landaola Sarien seigarren edizioko sariak, martxoaren 3an, 12:00etan.
