UTMB zirkuitoko ehun miliako lasterketa batean lehen hiru postuetan sailkatzen direnek zuzenean eskuratzen dute UTMBrako txartela, eta zapatuan Trail Alsace Grant Est by UTMB lasterketa irabazita, irailean irteera puntuan izango da mendaroarra.
Hogei ordu, hogei minutu eta 35 segundoko denbora behar izan zuen Maiorak 175 kilometroko ibilbidea osatzeko eta hiru orduko tartea atera zion bigarren sailkatuari, Marie Helene Postari (23:20:52). Gaur, lasterketaren biharamunean, "oso-oso pozik" dagoela aitortu dio BARRENi. Barikuan abiatu ziren korrikalariak, iluntzeko zortziretan, eta atzo arratsaldeko laurak pasatxoan helmugaratu zen Maiora, bere lasterketa eginda. Aitortu du hasieratik sentitu zela ondo, eta beharbada behar baino azkarrago abiatu zela baina sasoiko sentitzen zela eta erabaki zuela ez ibiltzea beste askotan bezala indarrak gerorako gordetzen. "Batzuetan gorde eta gorde aritzen zara, eta bukaeran, beti bezain lehertuta amaitzen duzu. Horregatik erabaki nuen ahal nuen bitartean gozatzea eta sentsazioei jaramon egitea. Mari Helene, atzetik zetorkidana, urruti ikusten nuen eta poliki-poliki tartea handitzen nindoala ikusita, gustura egin nuen korrika.