Santa Ana ermita berritzeko borondatea agertu du Mendaroko Udalak, eta orain arte emandako pausoak zeintzuk izan diren azaldu zien atzo herritarrei. Santa Ana ermita ez dago egoera onenean, eta jakina da herrian, azkeneko urteetan Santa Ana eguneko mezarik ere ez delako eman han, arriskutsu zegoelako. Eta gaiak ikusmina sortu du herrian. Atzo, alkatetzatik orain arte emandako pausoak azaldu zituen Enetz Ezenarro alkateak, herritarren ekarpenak jaso aurretik. 1986az geroztik Donostiako Gotzaindegiarena da ermita, eta ezer egiten hasteko haren baimena behar du Udalak. Donostiako Gotzaindegiak esana dio Udalari hilabete bat edo biren buruan prest izango duela ermitaren egoeraren inguruko txostena, eta ondoren, proiektua idatzi beharko da. Behin hori eginda eta aurrekontua dagoela, obra nola ordaindu aztertu beharko dute aldeek. Udalak Trinitate ermita konpondu zueneko eredua dauka buruan. Orduko hartan, Gipuzkoako Foru Aldundiak (%70), Donostiako Gotzaindegiak (%10), Mendaroko Udalak (%10) eta Mendaroko herriak (%10) ordaindu zuten obra eta orain ere antzeko ereduren bat izango den ustean abiatu du prozesua Udalak. Atzo, bileran parte hartu zuten herritarren gehiengo handia ermita konpontzearen alde agertu zen, baina finantziazioak sortu zuen eztabaidarik. Elizak inmatrikulazio bidez bere egindako eliza izanda, Elizak berak konpondu beharko lukeela uste zuten zenbaitzuk, eta Udalak dirua jartzekotan, ermitak herriarena izan beharko luketela beste zenbaitek; jabetzan ez bada, erabileran.
∞Lotura duten albisteak:
- Begi guztiak Santa Anan jarrita (2023-11-11)