Gipuzkoako Foru Aldundiak jakinarazi duenez, etenak bi erreietan izango du eragina eta itxita mantenduko dute "eremua egonkortu eta berriz ere erabat segurua izan arte". Hortaz, ez dute datarik zehaztu.
Lur-jausi bat gertatu zen urtarrilaren 27an N-634 errepideko 43. kilometroan (beheko irudian), eta bidea itxi behar izan zuten orduan ere. Pare bat egun beranduago, urtarrilaren 29an, errei bat zabaldu zuten, eta harrezkero, trafikoa semaforo bidez erregulatu dute. Gipuzkoako Foru Aldundiak otsailaren 13an jakinarazi zuen errepidean larrialdiko esku-hartzea egingo zuela; lanen iraupena hiru hilabete eta erdikoa izango zela ohartarazi zuen, eta, hortaz, maiatza amaitu artean errepidea errei bakarrera mugatuta egongo zela jakinarazi zuen. Atzodanik, ordea, erabat itxita dago bidea. Ezponda egonkortzeko lanak egiten ari diren eremuan lurra ezegonkorra delako hartu dute errepidea ixteko erabakia.
Gidariei ordezko ibilbideak erabili behar dituzte. Debatik Itziarrera joateko, San Rokeko bidea erabiltzea gomendatu dute; Itziartik Debara joateko, aldiz, herritarrek Lasturko bidea (Sasiolatik) edota autopista (Elgoibartik) hartu beharko dute.
