Eskualdez eskualde, bederatzi kanporaketa izango ditu Gelatik Plazara sariketak, eta Debabarrenekoa atzo jokatu zuten, Mendaron, udaletxeko batzar aretoan, 17:30ean hasita. Mutriku, Mendaro, Elgoibar eta Soraluzeko bertso eskoletako kideak aritu ziren bertsotan (LHko ikasleak), bi-hiru laguneko taldetan banatuta. Talde bakoitzak ondorengo lanak egin behar izan zituen: etxetik ekarritako agurra kantatu, puntuari erantzun koplan, bi oin emanda kopla bat osatu, ofizioka egin Irune Basagoiti Mendaroko bertso-eskolako irakaslearekin eta gaia emanda kopla bat osatu. Fin aritu ziren bertsolari gazteak, eta lan zaila izan zuten epaimahaikideek, baina Elgoibarko bertso-eskolakoen lan ona saritu zuten. Oihane Meabebasterretxea, Naia Eizagirre, Sare Rubio eta Nora Garatek osatu zuten Elgoibarko taldea, eta martxoaren 30ean Bertsozale Elkarteak Alegin ospatuko duen Gipuzkoako bertso-eskolen egunean izango dute finala. Egun osoko jai-egitaraua antolatu dute Bertsozale Elkartekoek, eta tartean, DBHko ikasleen kanporaketak ere izango direla aurreratu dute.