PSE-EE izan da hirugarren indarra 7.760 botorekin eta laugarrena, berriz, Elkarrekin Podemos, 2.302 boto jasota. Azkenik, PPk, 1.457 eskuratu ditu. Herriz herriko emaitzei erreparatuz gero, EHBilduk lau herritan irabazi du: Soraluzen, Mendaron (aurretik EAJ zegoen), Deban eta Mutrikun; EAJk bi herritan: Mallabian eta Elgoibarren; eta, azkenik, PSE-EE izan da indarrik bozkatuena bailarako bi herri nagusietan: Ermuan eta Eibarren.
Debabarrenean, hiru alderdi nagusiek jaso dituzte 2019an baino boto gutxiago. Guztien artean, PSE-EE izan da jeitsierarik handiena izan duena, 2.371 boto galduta. EAJk ere boto galera handia izan du: 1.373 boto gutxiago eta bailarako alderdirik bozkatuena izateari laga dio EH Bilduren mesedetan. Lehen aldiz, koalizio independentista bihurtu da bailarako indarrik bozkatuena.
Ondorengoak izan dira emaitzak herriz herri Debabarrenean, handienetik txikienerako hurrenkeran:
• Eibarren PSE-EEk irabazi du baina zinegotzi bat galdu du
Bailarako herri nagusian, Eibarren, PSE-EEk irabazi ditu hauteskundeak baina zinegotzi bat galdu du eta aldiz, EH Bildu bigarren indar moduan kokatu da zinegotzi bat gehiago eskuratuta. EAJ, berriz, hirugarren indarra izatera pasatu da zinegotzi kopuruari eutsita. Honela gelditu da alderdi bakoitzaren zinegotzi kopurua: PSE-EE-k 8, EHBilduk 6, EAJ-k 6 eta Elkarrekinek 1.
• Ermuan PSE-EEk irabazi du baina zinegotzi bat galduta
Ermuan, PSE-EEk irabazi ditu hauteskundeak baina 2019ko hauteskundeetan baino 1.091 euro gutxiago eskuratu ditu eta zinegotzi bat galdu du. EAJ-k ere zinegotzi bat galdu du eta ostera, EH Bilduk zinegotzi bat gehiago eskuratu du eta bigarren indarra izatera pasatu da. PPk gora egin du eta zinegotzi bat gehiago eskuratu du. Elkarrekinek zinegotzi kopuru berari eutsi arren, gora egin du boto kopuruan. Honela gelditu da alderdi bakoitzaren zinegotzi kopurua: PSE-EEk 6, EHBilduk 4, EAJk 3, Elkarrekinek 2 eta PPk 2.
• Elgoibarren EAJk irabazi du zinegotzi kopuruari eutsita
Elgoibarren, EAJ izan da garaile baina aurreko hauteskundeetan baino 362 gutxiago jasota. Bigarren izan da EH Bildu, 10 boto gutxiago eskuratuta. Biek eutsi diote aurretik zuten zinegotzi kopuruari. PSE-EEk, ostera, zinegotzi bat gehiago eskuratu du eta Elkarrekinek zuen bakarra galdu du. Honela gelditu da alderdi bakoitzaren zinegotzi kopurua: EAJk 8, EH Bilduk 7 eta PSE-EEk 2.
• Deban EH Bilduk irabazi du baina EAJk berdindu egin du zinegotzi kopuruan
Deban, EH Bildu izan da garaile 2019an baino 48 boto gehiago eta zinegotzi kopuru bera eskuratuta, baina aldi berean EAJk nabarmen egin du gora, hiru zinegotzi gehiago eskuratu ditu -aurretik zuen kopuruaren bikoitza- eta berdindu egin du EH Bilduren zinegotzi kopurua. Bestalde, Elkarrekinek, lehen aldiz, zinegotzia eskuratu du. Gogoratu behar da, 2019an Debarren Ahotsak 4 zinegotzi eskuratu zituela eta hauteskunde hauetan ez dela aurkeztu. Honela gelditu da alderdi bakoitzaren zinegotzi kopurua: EH Bilduk 6, EAJk 6 eta Elkarrekinek 1.
• Mutrikun EH Bilduk irabazi du zinegotzi kopuruari eutsita
Mutrikun, EH Bildu izan da garaile, baina 2019an baino 189 boto gutxiago eskuratuta, hala ere, zinegotzi kopuruari eutsi dio. EAJ izan da bigarren indarra eta jeltzaleek ere 184 boto gutxiago jaso badituzte ere, zinegotzi kopuruari eutsi diote. Berdiak Equo izan da nobedadea, lehen aldiz, zinegotzi bat eskuratu baitu. Honela gelditu da alderdi bakoitzaren zinegotzi kopurua: EH Bilduk 7, EAJk 5 eta Berdiak Equok 1.
• Soraluzen EH Bilduk alkatetza berreskuratu du
Soraluzen EH Bildu izan da garaile, zinegotzi bat gehiago eskuratuta eta hala, gehiengo osoa eta alkatetza berreskuratu du. Izan ere, EAJk zinegotzi bat galdu du eta PSE-EE zinegotziei eutsi dien arren, ez dute gehiengoa errepikatzeko aukerarik izango. Honela gelditu da alderdi bakoitzaren zinegotzi kopurua: EHBilduk 6, EAJk 4 eta PSE-EE 2.
• Mendaron EH Bilduk alkatetza berreskuratu du
Mendaron EH Bilduk irabazi du, zinegotzi kopuruari eutsiz eta horrek alkatetza ziurtatu dio. Izan ere, EAJk zinegotzi bat galdu du eta PSE-EEk ere bai, zuen bakarra. Honela gelditu da alderdi bakoitzaren zinegotzi kopurua: EH Bilduk 5 eta EAJk 4.
• Mallabian EAJk irabazi du zinegotzi bat galduta
Mallabian, EAJ izan da garaile eta 113 boto galdu ondoren, jeltzaleek zinegotzi bat galdu dute. EH Bilduk, berriz, 2019ko hauteskundeetan baino 22 boto gehiago eskuratu ditu eta zinegotzi bat irabazi du. Honela gelditu da alderdi bakoitzaren zinegotzi kopurua: EAJk 5 eta EH Bilduk 4.
Debabarrena