EH Bilduko hautagaiek Elgoibarko Udalean azken legegintzaldian egindako lanaren errepasoa egin zuten, eta legegintzaldi berrirako dituzten asmoen berri eman zuten, banan banan, Kalegoen plazan batutako herritarren aurrean.
Lohitzune Txarolak eta Garazi Mugertzak EH Bilduk zabaldu dituen bideen inguruan berba egin zuten. Besteak beste, talde lana goraipatu zuten. "PNV-PSE-PPren kartel pertsonalisten aurrean, EH Bilduk taldea aurkezten du, taldelana delako gurea, denok beharrezkoak garelako herrigintzan". Fiskalitate eredua ere izan zuten hizpide. "Argi genuen gizarte justuagoa eraikitzeko fiskalitate justua behar zela, gipuzkoarron %100aren aldekoa, eta horretan jardun dugu".
Pello Urizarrek ateak herritarrei irekitzea tokatzen dela esan zuen, "leihoak ireki aire berriari eta alfonbrak altxa ustelkeriari". Bere esanetan, gizarte hobea, libreagoa, justizia sozialean oinarritua eraiki nahi dute. "Ez da kanpainako leloa, azken lau urteotako lanaren argazkia baizik", adierazi zuen.
EH Bilduren Elgoibarko Udalerako alkategai Jose Luis Ibartzabalek eman zion amaiera ekitaldi politikoari.
