Azken minutura arte aprobetxatu nahi izan du EH Bilduk hauteskunde kanpaina eta bi politikari kataluniarrekin 'Pikoteo Tertulia' egin dute Elgoibarren gaur gauean.
EH Bildu koalizioak Donostian egin du kanpaina bukaerako ekitaldia, eta han parte hartu ostean etorri dira Elgoibarrera Joan Tarda (ERC) eta David Fernandez (Ezker Indep.) politikari kataluniarrak, ia ordubeteko atzerapenarekin izan bada ere. Elgoibarko EH Bilduk antolatutako 'Pikoteo Tertulian' parte hartu dute biek. Naiz egunkariko kazetari Ion Telleriak gidatu du tertulia eta hainbat gairen inguruan duten iritzia eman dute Tardak zein Fernandezek: Katalunia, Euskal Herria, Madril, erabakitzeko eskubidea, akordioak edo aldebakartasuna, besteak beste.
